Fafda Jalebi Movie Release Date: ગુજરાતી સિનેમાપ્રેમીઓ માટે દિવાળીના તહેવારને વધુ રંગીન અને મનોરંજક બનાવવા માટે એક મોટો ધમાકો થયો છે. ‘હું ઇકબાલ’ અને ‘ભ્રમ’ જેવી સફળ ફિલ્મો આપનારા જાણીતા લેખક-દિગ્દર્શક પલ્લવ પરીખ પોતાની નવી ગુજરાતી ફિલ્મ 'ફાફડા જલેબી' (Fafda Jalebi) સાથે મોટા પડદે કમબેક કરવા જઈ રહ્યા છે. “આ દિવાળી, ફાફડા-જલેબી વાળી” ના મનોરંજક કેચફ્રેઝ સાથે ફિલ્મના ઓફિશિયલ પોસ્ટરની જાહેરાત કરવામાં આવી છે.
દિવાળીએ થશે મનોરંજનનો ધમાકો
આ ફિલ્મ આ વર્ષે દિવાળીના પાવન અવસરે એટલે કે 6 નવેમ્બર, 2026ના રોજ વિશ્વભરના સિનેમાઘરોમાં રિલીઝ થવા માટે તૈયાર છે. ઇરાદા સ્ટુડિયોઝ (Iraada Studioz) અને આરંભ મોશન પિક્ચર્સ (Aarambh Motion Pictures) ના બેનર હેઠળ પ્રસ્તુત થઈ રહેલી આ ફિલ્મ સિટીશોર ટીવી (CityShor.TV) પ્રોડક્શનનું સાહસ છે. આ ફિલ્મના નિર્માતા પલ્લવ પરીખ અને ફાલ્ગુની પટેલ છે.
દમદાર સ્ટારકાસ્ટનું અદ્ભુત કોમ્બિનેશન
'ફાફડા જલેબી' માં ઢોલિવૂડના જાણીતા અને લોકપ્રિય કલાકારોની મોટી ફોજ જોવા મળશે. ફિલ્મની મુખ્ય સ્ટારકાસ્ટમાં સમાવિષ્ટ છે:
મલ્હાર ઠાકર
અભિનય બેંકર
પરીક્ષિત તમાલિયા
પૂજા જોશી
હીના જયકિશન
મેઘા વ્યાસ
ગુજરાતી ફિલ્મ ઈન્ડસ્ટ્રીના આ તમામ દિગ્ગજ કલાકારો એકસાથે એક જ સ્ક્રીન પર જોવા મળશે, જેના કારણે ફેન્સમાં આ ફિલ્મને લઈને ભારે ઉત્સાહ અને ઉત્સુકતા જોવા મળી રહી છે.
પોસ્ટરે વધારી સિનેપ્રેમીઓની ઉત્સુકતા
ફિલ્મનું પોસ્ટર રિલીઝ થતાં જ સોશિયલ મીડિયા પર વાયરલ થઈ ગયું છે. પોસ્ટરમાં દર્શાવવામાં આવેલ વિન્ટેજ લુક અને કલાકારોનો અનોખો અંદાજ એ વાતનો સંકેત આપે છે કે ફિલ્મમાં મનોરંજન, કોમેડી અને ડ્રામાનો જબરદસ્ત તડકો જોવા મળશે. ગુજરાતીઓની શાન અને પ્રિય વાનગી એવી 'ફાફડા-જલેબી' ના નામ પરથી બનેલી આ ફિલ્મ તહેવારની મોસમમાં દર્શકોને થિયેટરો સુધી ખેંચી લાવવા માટે સંપૂર્ણ રીતે તૈયાર છે.