Miss World 2026: વિયેતનામ દ્વારા આગામી 73મી મિસ વર્લ્ડ સ્પર્ધા માટેના સત્તાવાર કાર્યક્રમની જાહેરાત કરવામાં આવી છે. આ આંતરરાષ્ટ્રીય સ્પર્ધા 8 ઓગસ્ટથી 6 સપ્ટેમ્બર 2026 દરમિયાન વિયેતનામના ક્વૉંગ નિન્હ, હાઈ ફોંગ અને ન્હા ટ્રાંગ જેવા સુંદર તટીય શહેરોમાં યોજાશે. આ વર્ષની સ્પર્ધા મિસ વર્લ્ડ સંસ્થાની 75મી વર્ષગાંઠ હોવાથી તેને ખૂબ જ ભવ્ય રીતે ઉજવવાનું આયોજન કરવામાં આવ્યું છે.
એક મહિના સુધી ચાલશે વિવિધ સ્પર્ધાઓ
આ મેગા ઇવેન્ટમાં વિશ્વના વિવિધ દેશો અને પ્રદેશોમાંથી અંદાજે 120 પ્રતિનિધિઓ ભાગ લેશે, જે લગભગ એક મહિના સુધી વિવિધ પ્રવૃત્તિઓમાં જોડાશે.
પ્રથમ તબક્કો (8 થી 12 ઓગસ્ટ): ક્વૉંગ નિન્હમાં સ્પર્ધકોનું સ્વાગત કરવામાં આવશે અને 11 ઓગસ્ટના રોજ હા લોંગ મરીના સ્ક્વેર ખાતે ભવ્ય ઉદઘાટન સમારોહ યોજાશે.
બીજો તબક્કો (12 થી 20 ઓગસ્ટ): હાઈ ફોંગ શહેરમાં 16 ઓગસ્ટે ટેલેન્ટ ઓડિશન, 17 ઓગસ્ટે શેફ બ્યુટી પ્રોગ્રામ, 18 ઓગસ્ટે ફેશન ફેસ્ટ અને 19 ઓગસ્ટે સ્પોર્ટ્સ ચેલેન્જ યોજાશે.
અંતિમ તબક્કો (20 ઓગસ્ટથી 6 સપ્ટેમ્બર): ન્હા ટ્રાંગમાં હેડ-ટુ-હેડ રાઉન્ડ, ટેલેન્ટ શો, ઇન્ટરવ્યુ અને ચેરિટી ગાલા જેવા મહત્વના રાઉન્ડ યોજાશે. 2 સપ્ટેમ્બરે 'ડાંસીસ ઓફ ધ વર્લ્ડ' કાર્યક્રમમાં દરેક દેશની સાંસ્કૃતિક ઝલક જોવા મળશે.
વિયેતનામની પ્રતિનિધિ લે ગુયેન બાઓ ન્ગોકની તૈયારી
આ વર્ષે વિયેતનામનું પ્રતિનિધિત્વ લે ગુયેન બાઓ ન્ગોક કરી રહી છે. તેણી આંતરરાષ્ટ્રીય મંચ પર 'સનલાઇટ ઓન ધ સ્કાય' નામની વિશેષ પરંપરાગત વેશભૂષામાં જોવા મળશે, જેણે અગાઉ બેસ્ટ કોસ્ચ્યુમનો એવોર્ડ પણ જીત્યો છે. ટેલેન્ટ રાઉન્ડમાં તેણી પથ્થરના ઝાયલોફોન સાથે પરંપરાગત વિયેતનામી સંગીત રજૂ કરીને વિશ્વને પોતાની સંસ્કૃતિનો પરિચય કરાવશે.
5 સપ્ટેમ્બરે ગ્રાન્ડ ફિનાલે
મિસ વર્લ્ડ સ્પર્ધાનો ભવ્ય ફાઈનલ સમારોહ 5 સપ્ટેમ્બર 2026 ના રોજ ન્હા ટ્રાંગ શહેરમાં યોજાશે. આ કાર્યક્રમનું વિશ્વના અનેક દેશોમાં જીવંત પ્રસારણ કરવામાં આવશે. આ ઇવેન્ટ દ્વારા વિયેતનામ તેની સંસ્કૃતિ, પર્યટન અને આંતરરાષ્ટ્રીય સ્તરના કાર્યક્રમો યોજવાની ક્ષમતાને વિશ્વ સમક્ષ પ્રદર્શિત કરવા માંગે છે. અંતિમ દિવસે વર્તમાન મિસ વર્લ્ડ ઓપલ સુચાતા તેમની ઉત્તરાધિકારીને તાજ પહેરાવશે. આ સફર માત્ર સુંદરતાની નથી, પરંતુ 'બ્યુટી વિથ અ પર્પઝ' એટલે કે હેતુ સાથે સુંદરતાના અભિયાનને પણ આગળ ધપાવશે.