Unique names of India: ભારત માત્ર એક દેશ નથી, પણ સદીઓ જૂનો ઈતિહાસ, જ્ઞાન અને સંસ્કૃતિનો મહાસાગર છે. આજે વિશ્વસ્તરે આપણા દેશને India અને Bharat તરીકે ઓળખવામાં આવે છે, પરંતુ પ્રાચીન સભ્યતાઓ, પ્રવાસીઓ અને વેપારીઓએ ભારતને પોતાની ભાષામાં અલગ-અલગ સન્માનજનક અનોખા નામો આપ્યા હતા. આ નામો પાછળ એક સમૃદ્ધ ઈતિહાસ અને ગૌરવશાળી વારસો છુપાયેલો છે.
ચીન – તિયાનઝુ (Tianzhu)
પ્રાચીન ચીનમાં ભારતને તિયાનઝુ કહેવામાં આવતું હતું, જે સિંધુ શબ્દ પરથી ઉતરી આવ્યો હતો. ચીની બૌદ્ધ ભિક્ષુઓ ભારતને જ્ઞાન, અધ્યાત્મ અને ભગવાન બુદ્ધની પવિત્ર ભૂમિ માનતા હતા. પ્રસિદ્ધ ચીની પ્રવાસીઓ ફાહિયાન અને હ્યુ-એન-સાંગે પણ પોતાના પ્રવાસ વર્ણનમાં ભારત માટે તિયાનઝુ શબ્દનો જ ઉપયોગ કર્યો હતો. જોકે, આધુનિક ચીનમાં હવે ભારત માટે યિંદુ શબ્દ વપરાય છે.
જાપાન – તેનજિકુ (Tenjiku)
જાપાની ભાષામાં ચીન દ્વારા જ આ શબ્દ તેનજિકુ તરીકે પહોંચ્યો હતો. જાપાની સાહિત્ય, સંસ્કૃતિ અને લોકકથાઓમાં ભારતને પવિત્ર જ્ઞાનના કેન્દ્ર તરીકે ખૂબ જ સન્માનપૂર્વક તેનજિકુ કહીને સંબોધવામાં આવ્યું છે.
ઈઝરાયેલ (હિબ્રૂ ભાષા) – હોદુ (Hodu)
હિબ્રૂ ભાષામાં ભારતને હોદુ કહેવામાં આવે છે, જે સિંધુ નદીના નામ પરથી બન્યો છે. પવિત્ર બાઈબલના બુક ઓફ એસ્થરમાં પણ ભારત માટે આ શબ્દનો ઉલ્લેખ મળે છે. ઈઝરાયેલમાં સત્તાવાર રીતે India વપરાય છે, પરંતુ ત્યાંની સ્થાનિક હિબ્રૂ ભાષા, શાળાઓ અને રોજિંદી બોલચાલમાં આજે પણ ભારતને હોદુ જ કહેવાય છે.
ઈરાન/પર્શિયા – હિન્દ અને હિન્દુસ્તાન
પ્રાચીન ફારસી ભાષામાં સ નો ઉચ્ચાર હ થતો હતો. આથી સિંધુ નદી પરથી તેઓ આ ભૂમિને હિન્દ અને રહેવાસીઓને હિન્દુ કહેવા લાગ્યા. આ હિન્દ શબ્દ સાથે સ્તાન (સ્થાન/દેશ) જોડાવાથી હિન્દુસ્તાન શબ્દ બન્યો. મુઘલ કાળ દરમિયાન આ નામ અત્યંત લોકપ્રિય બન્યું હતું.
કોરિયા – ચેઓનચુક (Cheonchuk)
પ્રાચીન કોરિયન અને બૌદ્ધ સાહિત્યમાં ભારત માટે ચેઓનચુક શબ્દ જોવા મળે છે. જોકે, આધુનિક સમયમાં દક્ષિણ કોરિયામાં ભારતને સત્તાવાર રીતે ઈન્ડો (Indo) તરીકે ઓળખવામાં આવે છે.
વિશ્વના વિવિધ દેશોમાં ભારતને મળેલા આ તમામ નામો માત્ર શબ્દો નથી, પરંતુ પ્રાચીન કાળથી જ ભારતનો વેપાર, બૌદ્ધ ધર્મ અને આધ્યાત્મિક પ્રભાવ સમગ્ર વિશ્વમાં કેટલો ઊંડો હતો તે સાબિત કરે છે.