Gujarat Weather Forecast: ગુજરાતના મોટાભાગના શહેરોમાં ગઇકાલે ગરમીનો પારો 35 ડિગ્રી કે તેથી વધુ નોંધાયો હતો. જોકે આજથી રાજ્યમાં તાપમાનનો પારો ફરી ગગડશે અને ગરમીનું પ્રમાણ ઘટશે તેવી હવામાન વિભાગની આગાહી છે. લઘુત્તમ અને મહત્તમ તાપમાનમાં આજથી 2થી 3 ડિગ્રીનો ઘટાડો જોવા મળી શકે છે. એટલે કે રાજ્યમાં હજી એક સપ્તાહ બેવડી ઋતુનો અનુભવ થઇ શકે છે.
હવામાન વિભાગની શું છે આગાહી
હવામાન વિભાગની આગાહી અનુસાર, આગામી 7 દિવસ દરમિયાન રાજ્યના મહત્તમ તાપમાનમાં ધીમે ધીમે 2 થી 3 ડિગ્રીનો ઘટાડો થઇ શકે છે. આ ઉપરાંત, આગામી ૩ દિવસ દરમિયાન લઘુત્તમ તાપમાનમાં પણ 2 થી 3 ડિગ્રીનો ઘટાડો થશે, ત્યારબાદના દિવસોમાં તેમાં કોઈ મોટો ફેરફાર જોવા મળશે નહીં. અમદાવાદ અને તેની આસપાસના પડોશી વિસ્તારોમાં આકાશ મોટેભાગે એકદમ સ્વચ્છ રહેશે. અમદાવાદ શહેરમાં મહત્તમ તાપમાન 35 ડિગ્રી અને લઘુત્તમ તાપમાન 19 ડિગ્રીની આસપાસ રહેવાની સંભાવના છે.
ઉત્તર ભારતમાં વેસ્ટર્ન ડિસ્ટર્બન્સની અસર
ઉત્તર ભારતમાં પશ્ચિમી વિક્ષેપ( વેસ્ટર્ન ડિસ્ટર્બન્સ)ની અસર હેઠળ લદ્દાખ, જમ્મુ-કાશ્મીર, હિમાચલ પ્રદેશ અને ઉત્તરાખંડ સહિત પડોશી દેશો નેપાળ અને તિબેટમાં વાદળોના બહુવિધ સ્તરો છવાયેલા છે. આ વિસ્તારોમાં છૂટાછવાયાથી લઈને મધ્યમ વાદળો અને કેટલીક જગ્યાએ તીવ્ર હવામાનની ગતિવિધિઓ જોવા મળી છે. મહારાષ્ટ્રમાં મધ્યમ સક્રિયતાવાળા વાદળો જોવા મળ્યા છે, જ્યારે ગુજરાત, રાજસ્થાન અને મધ્ય પ્રદેશમાં છૂટાછવાયા વાદળો જોવા મળ્યા છે.
કેરળ, તમિલનાડુ, લક્ષદ્વીપ અને આંદામાન-નિકોબાર ટાપુઓ પર મધ્યમથી ભારે વાદળો છવાયેલા છે. તેલંગાણા, રાયલસીમા, આંધ્રપ્રદેશના દરિયાકાંઠાના વિસ્તારો અને કર્ણાટકમાં પણ સામાન્યથી મધ્યમ વાદળછાયું વાતાવરણ જોવા મળ્યું છે. છત્તીસગઢ, ઓડિશા, સિક્કિમ, આસામ, અને અરુણાચલ પ્રદેશમાં પણ છૂટાછવાયાથી મધ્યમ વાદળોની હાજરી નોંધાઈ છે.