Gujarat Weather Forecast: ગુજરાતમાં બેવડી ઋતુનો માર હજી 24 કલાક સુધી રહી શકે છે. 24 કલાક બાદ રાજ્યમાં મહત્તમ અને લઘુત્તમ તાપમાનમાં તબક્કાવાર વધારો જોવ મળશે. જેના પગલે રાજ્યમાં ગરમીના પ્રમાણમાં વધારો થશે. જોકે ત્યારબાદ રાજ્યમાં ફરી ઠંડીનું પ્રમાણ વધી શકે છે.
હવામાન વિભાગની શું છે આગાહી
હવામાન વિભાગે જણાવ્યા અનુસાર, આગામી 24 કલાક દરમિયાન મહત્તમ તાપમાનમાં કોઈ મોટો ફેરફાર થવાની શક્યતા નથી, પરંતુ તે પછીના બે દિવસોમાં ગરમીમાં 2 થી 3 ડિગ્રી સેલ્સિયસનો વધારો થઈ શકે છે. જોકે, ત્યારબાદના દિવસોમાં તાપમાનમાં ફરીથી 2 થી 3 ડિગ્રીનો ઘટાડો થવાની સંભાવના વ્યક્ત કરવામાં આવી છે. લઘુત્તમ તાપમાનમાં પણ આગામી 48 કલાક દરમિયાન 2 થી 3 ડિગ્રીનો ધીમે ધીમે વધારો થવાની આગાહી છે. નોંધનીય છે કે છેલ્લા 24 કલાકમાં ગુજરાત રિજિયન અને કચ્છના કેટલાક ભાગોમાં લઘુત્તમ તાપમાન સામાન્ય કરતા વધુ નોંધાયું હતું.
ખાસ કરીને અમદાવાદ અને તેની આસપાસના વિસ્તારો માટે, 20 ફેબ્રુઆરી સુધી આકાશ મુખ્યત્વે સ્વચ્છ રહેવાની શક્યતા છે. શહેરમાં મહત્તમ તાપમાન 31 ડિગ્રી સેલ્સિયસ અને લઘુત્તમ તાપમાન 19 ડિગ્રી સેલ્સિયસની આસપાસ રહે તેવી વકી છે. હાલમાં ઉત્તર રાજસ્થાન અને તેની આસપાસના વિસ્તારોમાં વેસ્ટર્ન ડિસ્ટર્બન્સ સક્રિય છે, જેની અસર વાતાવરણ પર જોવા મળી રહી છે.
ઉત્તર ભારતમાં તાપમાનમાં વધારો
હવામાન વિભાગ અનુસાર, ઉત્તર પશ્ચિમ ભારતના મેદાની વિસ્તારોમાં ગરમીનું પ્રમાણ વધવાની શક્યતા છે. આગામી સાત દિવસો દરમિયાન આ વિસ્તારોમાં મહત્તમ તાપમાનમાં 3 થી 4 ડિગ્રી સેલ્સિયસ અને લઘુત્તમ (રાત્રિના) તાપમાનમાં 2 થી 3 ડિગ્રી સેલ્સિયસનો ક્રમશઃ વધારો થવાની સંભાવના વ્યક્ત કરવામાં આવી છે. ગુજરાત રાજ્ય વિશે વાત કરીએ તો, આગામી બે દિવસ દરમિયાન લઘુત્તમ અને મહત્તમ તાપમાનમાં 2 થી 3 ડિગ્રીનો વધારો થઈ શકે છે, જોકે ત્યારબાદ મહત્તમ તાપમાનમાં 2 થી 3 ડિગ્રીનો ઘટાડો થવાની પણ શક્યતા છે.
છેલ્લા 24 કલાકના અવલોકન મુજબ, ત્રિપુરા અને પંજાબના કેટલાક ભાગોમાં ગાઢ ધુમ્મસ છવાયેલું રહ્યું હતું. જ્યારે હરિયાણા, પૂર્વ રાજસ્થાન, પશ્ચિમ મધ્ય પ્રદેશ અને દક્ષિણ ભારતમાં કેરળના એકાદ સ્થળે કરા પડવાના (hailstorm) બનાવો પણ નોંધાયા છે. મધ્ય પ્રદેશ અને ઉત્તરાખંડમાં આજે ગાજવીજ અને વજ્રપાત સાથે તોફાની પવન ફૂંકાવાની શક્યતા હોવાથી ત્યાં પણ યલો વોર્નિંગ આપવામાં આવી છે. આ ઉપરાંત, ૨૨ ફેબ્રુઆરીથી એક નવો પશ્ચિમી વિક્ષેપ (Western Disturbance) સક્રિય થવાની સંભાવના છે જે પશ્ચિમી હિમાલયના વિસ્તારોને અસર કરી શકે છે.