Anand News: આણંદ જિલ્લાના ચિખોદરા ગામમાં રિક્ષા ચાલક દ્વારા એક જ પરિવારના ત્રણ સભ્યો પર કરાયેલા જીવલેણ હુમલાએ વિસ્તારમાં દહેશત છવાઈ ગઈ છે. મળતી માહિતી મુજબ, સ્ટીવન ઉર્ફે સાગર મેકવાન નામના રિક્ષા ચાલકે રાત્રિના સમયે મહિલા, તેમની બહેન અને પતિ પર ચપ્પાથી અનેક ઘા ઝીંકી હત્યાનો પ્રયાસ કર્યો હતો. ગંભીર રીતે ઘાયલ થયા બાદ ત્રણેયને તરત જ હોસ્પિટલ ખસેડવામાં આવ્યા છે, જ્યાં તેમની સારવાર ચાલુ છે.
પ્રાથમિક વિગતો પ્રમાણે રિક્ષા ચાલકે રિક્ષા બંધ કરવાના મુદ્દે મહિલાથી થયેલા વિવાદની રિસ રાખી હુમલો કર્યો હોવાનું જાણવા મળે છે. મહિલા ઘર બહાર આવી તરત જ આરોપીએ અચાનક ચપ્પા વડે હુમલો શરુ કરી દીધો હતો. મહિલાની બૂમ સાંભળી પતિ અને બહેન બચાવવા દોડી આવ્યા, પરંતુ આરોપીએ તેમની ઉપર પણ અંધાધૂંધી પ્રહાર કરી ઘાયલ કર્યા હતા.
આ બનાવને લઈને ચિખોદરા વિસ્તારમાં ભારે ચકચાર પ્રસરી છે. ઘટનાની જાણ થતાં આણંદ ગ્રામ્ય પોલીસે કેસ નોંધ્યો છે અને પાડોશ વિસ્તારોમાં તપાસના ચક્રો તેજ કરી આરોપી સ્ટીવન ઉર્ફે સાગર મેકવાનની શોધખોળ શરૂ કરી છે. પોલીસ ટીમોને અલગ-અલગ સ્થળે રવાના કરવામાં આવી છે. ગંભીર ઈજાઓ સાથે હોસ્પિટલમાં દાખલ થયેલા ત્રણેય સભ્યોની હાલત ઉપર તબીબોની નજર રાખવામાં આવી રહી છે. આ હત્યાના પ્રયાસની ઘટના બાદ ગામમાં ભય અને આક્રોશનું માહોલ છવાયો છે.