Ankleshwar MD Drugs Lab: ભરૂચ જિલ્લાના અંકલેશ્વરથી એક ચોંકાવનારા સમાચાર સામે આવ્યા છે. અંકલેશ્વર GIDC વિસ્તારમાં એક રહેણાંક સોસાયટીમાંથી MD ડ્રગ્સ બનાવતી ગેરકાયદેસર લેબ ઝડપાઈ છે. ભરૂચ SOG પોલીસ ટીમે અહીં દરોડા પાડી એક આરોપીની ધરપકડ કરવા સાથે MD ડ્રગ્સ બનાવતી ગેરકાયદેસર લેબનો પર્દાફાશ કર્યો છે.
રહેણાંક સોસાયટીમાં ધમધમતી MD ડ્રગ્સ બનાવતી લેબ
આ અંગે મળતી વિગત અનુસાર ભરૂચ SOG પોલીસની ટીમે અંકલેશ્વર GIDC વિસ્તારમાં સ્થિત સિદ્ધ કો-ઓપરેટીવ હાઉસીંગ સોસાયટીમાં ધમધમતી MD ડ્રગ્સ બનાવતી લેબ ઝડપી પાડી છે. પોલીસ ટીમે સિદ્ધ કો.ઓ.હા. સોસાયટીના બી બ્લોકમાં આવેલા મકાન નંબર 301 પર દરોડો પાડ્યો હતો.
70 ગ્રામ MD ડ્રગ્સ અને રો-મટીરીયલ જપ્ત
પોલીસ ટીમને આ મકાનના બાથરૂમમાંથી MD ડ્રગ્સ બનાવતી લેબ મળી આવી હતી. SOG પોલીસ ટીમે દરોડા દરમિયાન આશરે 70 ગ્રામ તૈયાર MD ડ્રગ્સ અને મોટી માત્રામાં રો મટીરીયલ જપ્ત કર્યું હતું. સાથે જ અનિલ રાખોલિયા નામના વ્યક્તિની ધરપકડ કરવામાં આવી છે.
આ પણ વાંચો: વાગરામાં સ્પા સંચાલકનો હાથ-પગ બાંધેલી હાલતમાં મૃતદેહ મળ્યો, ગળે ટુંપો આપી હત્યા થયાની શક્યતા
આરોપી અનિલ રાખોલિયાની ધરપકડ
પોલીસ તપાસમાં સામે આવેલી માહિતી અનુસાર આરોપી અનિલ રાખોલિયા ફાર્મા કંપનીમાં કેમિસ્ટ તરીકે કામ કરતો હતો. આરોપીએ સિદ્ધ કો.ઓ.હા. સોસાયટીના બી બ્લોકમાં આ મકાન નંબર 301 ભાડે રાખ્યું હતું. આરોપી પોતાની જાણકારીનો ઉપયોગ કરી મકાનના બાથરૂમમાં નાની લેબ બનાવી ગેરકાયદેસર MD ડ્રગ્સ બનાવતો હતો. આરોપી GIDC વિસ્તારમાંથી છૂટક રો-મટીરિયલ લાવી ગૂગલ પરથી માહિતી મેળવી વિવિધ કેમિકલના મિશ્રણથી ડ્રગ્સ તૈયાર કરતો હતો.
ભરૂચ SOG ટીમની તપાસ અને કાર્યવાહી
ભરૂચ SOG ટીમ દ્વારા આ સમગ્ર કાર્યવાહી હાથ ધરવામાં આવી હતી. હાલ આરોપી વિરુદ્ધ NDPS એક્ટ હેઠળ ગુનો દાખલ કરવામાં આવ્યો છે. સાથે જ આ ડ્રગ્સ સપ્લાય નેટવર્ક અંગે તેમજ નેટવર્કમાં સંડોવાયેલા લોકો અંગે માહિતી મેળવવા તપાસ શરૂ કરવામાં આવી છે.