Bhavnagar News: પશ્ચિમ રેલવે દ્વારા યાત્રિયોની સુવિધાને ધ્યાનમાં રાખીને ભાવનગર મંડળમાંથી પસાર થતી બે મહત્વપૂર્ણ સ્પેશિયલ ટ્રેનોના ફેરાને વિસ્તૃત કરવાની જાહેરાત કરવામાં આવી છે. આ નિર્ણયથી ભાવનગર, ધોળા, બોટાદ અને ગાંધીગ્રામ વચ્ચે મુસાફરી કરતા હજારો દૈનિક યાત્રીઓને લાંબા સમય સુધી લાભ મળતો રહેશે.
ભાવનગર મંડળના વરિષ્ઠ મંડળ વાણિજ્ય પ્રબંધક અતુલ કુમાર ત્રિપાઠીએ આપેલી માહિતી અનુસાર, ટ્રેન નંબર 09212/09211 બોટાદ-ગાંધીગ્રામ-બોટાદ દૈનિક સ્પેશિયલ (અનારક્ષિત)ના ફેરાને હવે 31 માર્ચ, 2026 સુધી લંબાવવામાં આવ્યા છે. અગાઉ આ ટ્રેનના ફેરા 28 ફેબ્રુઆરી, 2026 સુધી જ અધિસૂચિત કરવામાં આવ્યા હતા. યાત્રીઓની વધતી માંગ અને સુવિધાને ધ્યાનમાં રાખીને, ટ્રેન નંબર 09211 ગાંધીગ્રામ-બોટાદ સ્પેશિયલ અને ટ્રેન નંબર 09212 બોટાદ-ગાંધીગ્રામ સ્પેશિયલ, બંને હવે નિર્ધારિત નવી તારીખ એટલે કે 31 માર્ચ, 2026 સુધી નિયમિતપણે કાર્યરત રહેશે.
આ ઉપરાંત, ટ્રેન નંબર 09529/09530 ધોળા-ભાવનગર-ધોળા દૈનિક સ્પેશિયલ (અનારક્ષિત)ના ફેરાને પણ વિસ્તૃત કરવામાં આવ્યા છે. ટ્રેન નંબર 09529 ધોળા-ભાવનગર સ્પેશિયલ અને ટ્રેન નંબર 09530 ભાવનગર-ધોળા સ્પેશિયલ, જે અગાઉ 28 ફેબ્રુઆરી, 2026 સુધી ચાલવાની હતી, તે હવે 31 માર્ચ, 2026 સુધી પોતાની સેવાઓ આપશે. આ નિર્ણયથી ધોળા અને ભાવનગર વચ્ચે અવરજવર કરતા યાત્રીઓને માર્ચ 2026ના અંત સુધી આ ટ્રેન સેવાનો લાભ મળતો રહેશે.
પશ્ચિમ રેલવેના આ નિર્ણયથી ભાવનગર ડિવિઝનના લાંબા અંતરના અને દૈનિક યાત્રીઓને મોટી રાહત મળશે. આ સ્પેશિયલ ટ્રેનોની મુદત લંબાવાથી મુસાફરોને આગામી મહિનાઓ દરમિયાન પણ સરળતાથી અવરજવર કરવાની સુવિધા ઉપલબ્ધ રહેશે.