Jay Shah visited Kashtabhanjandev Hanumanji at Salangpurdham: શ્રી સ્વામિનારાયણ મંદિર વડતાલધામ સંચાલિત વિશ્વપ્રસિદ્ધ યાત્રાધામ સાળંગપુર ખાતે ભક્તિ અને શ્રદ્ધાનો માહોલ જોવા મળ્યો હતો. બુધવાર, 11 ફેબ્રુઆરી 2026ના રોજ ઇન્ટરનેશનલ ક્રિકેટ કાઉન્સિલ (ICC) ના નવનિયુક્ત ચેરમેન જયભાઈ શાહે સહપરિવાર શ્રીકષ્ટભંજનદેવ હનુમાનજી દાદાના દર્શન કરી આશીર્વાદ પ્રાપ્ત કર્યા હતા.
ભક્તિમય માહોલમાં દાદાની પૂજા-અર્ચના
જય શાહ જ્યારે સાળંગપુરધામ પધાર્યા ત્યારે મંદિરના વહીવટી સંતો અને ટ્રસ્ટીઓ દ્વારા તેમનું ઉમળકાભેર સ્વાગત કરવામાં આવ્યું હતું. જયભાઈએ પરિવાર સાથે દાદાના દરબારમાં પૂજા-અર્ચના કરી હતી અને મંત્રઘોષ સાથે દાદાની આરતીનો લાભ લીધો હતો. તેમણે દાદાના ચરણે ધજા અર્પણ કરી રાષ્ટ્રની સુખ-શાંતિ અને રમતજગતની પ્રગતિ માટે પ્રાર્થના કરી હતી.
સુપુત્રની તુલા વિધિ: આકર્ષણનું કેન્દ્ર
દર્શન દરમિયાન એક વિશેષ પ્રસંગ યોજાયો હતો, જેમાં જયભાઈ શાહે તેમના સુપુત્રની પેંડા અને સુખડીથી તુલા કરી હતી. શાસ્ત્રોક્ત વિધિ મુજબ યોજાયેલી આ તુલા વિધિ બાદ પ્રસાદનું વિતરણ કરવામાં આવ્યું હતું. શ્રદ્ધાળુઓમાં આસ્થા છે કે દાદાના ચરણે થતી આ પ્રકારની તુલા વિધિથી સુખ અને સમૃદ્ધિ પ્રાપ્ત થાય છે.
સંતોના આશીર્વાદ અને સ્વાગત
આ મંગલ અવસરે સાળંગપુર મંદિરના અગ્રણી સંતો ઉપસ્થિત રહ્યા હતા. જેમાં, શાસ્ત્રી સ્વામી હરિપ્રકાશદાસજી (અથાણાવાળા), કોઠારીશ્રી વિવેકસાગરદાસ સ્વામી, પૂજ્ય શ્રી શુકદેવ સ્વામી (શ્રી સ્વામિનારાયણ ગુરુકુળ-ગોકુલધામ નાર) વગેરે સંતોએ જયભાઈ શાહને આશીર્વાદ પાઠવ્યા હતા. સંતોએ જણાવ્યું હતું કે, જયભાઈ શાહ જે રીતે વૈશ્વિક સ્તરે રમતજગતનું નેતૃત્વ કરી રહ્યા છે, તેનાથી ભારતનું ગૌરવ વધ્યું છે. તેમણે જયભાઈની ઉત્તરોત્તર પ્રગતિ અને રાષ્ટ્રસેવા માટે દાદાના આશીર્વાદ કાયમ રહે તેવી મંગલ કામના કરી હતી.
સાળંગપુરધામમાં શ્રદ્ધાળુઓનો પ્રવાહ
જયભાઈ શાહની મુલાકાત સમયે મંદિરમાં મોટી સંખ્યામાં હરિભક્તો પણ ઉપસ્થિત હતા. મહાનુભાવોની મુલાકાતને પગલે સુરક્ષા અને વ્યવસ્થાના પણ ખાસ પ્રબંધ કરવામાં આવ્યા હતા. આ મુલાકાત બાદ જયભાઈએ મંદિરના વિવિધ સેવાકીય પ્રકલ્પોની પણ વિગતવાર માહિતી મેળવી હતી અને સાળંગપુરધામના દિવ્ય વાતાવરણનો અનુભવ કરી ધન્યતા અનુભવી હતી.
