Gujarat Local Body Polls 2026: બનાસકાંઠા જિલ્લામાં આગામી જિલ્લા પંચાયત, તાલુકા પંચાયત અને નગરપાલિકાની ચૂંટણી-2026માં વધુમાં વધુ મતદાન થાય તે હેતુથી વહીવટી તંત્ર દ્વારા વ્યાપક સ્વીપ ઝુંબેશ હાથ ધરવામાં આવી છે.
બનાસકાંઠા જિલ્લા ચૂંટણી અધિકારી મિહિર પટેલના માર્ગદર્શન હેઠળ સ્વીપ (SVEEP) નોડલ અધિકારી અને નાયબ જિલ્લા પ્રાથમિક શિક્ષણાધિકારી એસ.ડી. જોષીના નેતૃત્વમાં જિલ્લાની તમામ તાલુકા સ્વીપ ટીમો દ્વારા મતદારોને જાગૃત કરવા માટે વિવિધ રચનાત્મક પ્રવૃત્તિઓનું આયોજન કરવામાં આવ્યું છે.
આ અભિયાનનો મુખ્ય ઉદ્દેશ્ય આગામી ચૂંટણીમાં જિલ્લાના દરેક નાગરિકની સક્રિય ભાગીદારી સુનિશ્ચિત કરવાનો છે. આ અભિયાન અંતર્ગત જિલ્લાની પ્રાથમિક, માધ્યમિક અને ઉચ્ચતર માધ્યમિક શાળાઓ તેમજ જિલ્લા શિક્ષણ સમિતિ દ્વારા વિદ્યાર્થીઓ અને વાલીઓને અચૂક મતદાન કરવા માટેના શપથ લેવડાવવામાં આવ્યા હતા.
શૈક્ષણિક સંસ્થાઓમાં વકૃત્વ અને ક્વિઝ સ્પર્ધાઓ યોજીને લોકશાહીના મૂલ્યો વિશે સમજૂતી આપવામાં આવી રહી છે. આ ઉપરાંત, કોલેજોમાં યુવા મતદારોને લોકશાહીના પર્વમાં જોડાવા માટે વિશેષ પ્રેરણા આપવામાં આવી રહી છે, જેથી યુવાશક્તિ મતદાનમાં પોતાનું અમૂલ્ય યોગદાન આપી શકે.
ગ્રામીણ અને શહેરી વિસ્તારોમાં અસરકારક પ્રચાર માટે સ્થાનિક માધ્યમોનો ઉપયોગ કરવામાં આવી રહ્યો છે. દૂધ મંડળીઓમાં દૂધ ભરાવવા આવતા ગ્રાહકોને મતદાન માટે અપીલ કરવામાં આવી રહી છે, તો નગરપાલિકાઓની ગાર્બેજ વાનમાં મતદાન જાગૃતિની ઓડિયો ક્લિપ વગાડીને જન-જન સુધી સંદેશ પહોંચાડવામાં આવી રહ્યો છે.
સોશિયલ મીડિયા ઇન્ફ્લુએન્સર્સની મદદ લેવા સાથે બીએલઓ (BLO) અને શિક્ષકો દ્વારા ગામડાના વોટ્સએપ ગ્રુપમાં મતદાન જાગૃતિના ઓડિયો-વીડિયો શેર કરીને ડિજિટલ માધ્યમથી પણ પ્રચાર તેજ કરવામાં આવ્યો છે.
વિશેષ કરીને વયોવૃદ્ધ અને દિવ્યાંગ (PWD) મતદારોને મતદાન પ્રક્રિયામાં કોઈ મુશ્કેલી ન પડે તે માટે સ્વીપ ટીમ દ્વારા 'ડોર ટુ ડોર' સંપર્ક કરવામાં આવી રહ્યો છે. આ મતદારોને મતદાન મથક પર પૂરી પાડવામાં આવનારી સુવિધાઓની ખાતરી આપી પ્રોત્સાહિત કરવામાં આવ્યા છે. વિવિધ સામાજિક સંગઠનોના આગેવાનો સાથે બેઠકો યોજીને તેમના જૂથના મતદારો અચૂક મતદાન કરે તેવું આયોજન કરવામાં આવ્યું છે, જેથી બનાસકાંઠા જિલ્લો મતદાનમાં અગ્રેસર રહે.