Who is Ankita Parmar: ગુજરાતના રાજકારણમાં જ્યારે પણ ચૂંટણીનું બ્યુગલ વાગે છે, ત્યારે ભારતીય જનતા પાર્ટી હંમેશા તેના નવા પ્રયોગો અને આશ્ચર્યજનક નિર્ણયો માટે જાણીતું રહ્યું છે. આ વખતે વડોદરા જિલ્લા પંચાયતની ચૂંટણીમાં ભાજપે એક એવો ચહેરો મેદાનમાં ઉતાર્યો છે જે સોશિયલ મીડિયાની દુનિયામાં ધૂમ મચાવી રહ્યો છે. ઇન્સ્ટાગ્રામ પર 1 મિલિયન (10 લાખ) થી વધુ ફોલોઅર્સ ધરાવતી 'ડિજિટલ સ્ટાર' અંકિતા પરમારને પોર બેઠક પરથી ઉમેદવાર બનાવી ભાજપે સૌને ચોંકાવી દીધા છે. જોકે, આ પસંદગી પાછળ માત્ર ગ્લેમર નહીં પણ ઊંડું વહીવટી ગણિત છુપાયેલું છે.
જીમ ટ્રેનરથી યુવા મોરચાના ઉપપ્રમુખ સુધીની સફર
32 વર્ષીય અંકિતા પરમારની સફર અત્યંત રસપ્રદ રહી છે. રાજકારણમાં પ્રવેશતા પહેલા તેઓ એક વ્યાવસાયિક જીમ ટ્રેનર તરીકે કાર્યરત હતા અને સામાજિક સેવાના કાર્યોમાં સક્રિય હતા. 2021 માં વડોદરા તાલુકા પંચાયતના સભ્ય તરીકે ચૂંટાઈને તેમણે સત્તાવાર રાજકીય ઇનિંગ શરૂ કરી હતી. સપ્ટેમ્બર 2023 માં તેમની વડોદરા તાલુકા પંચાયતના પ્રમુખ તરીકે નિમણૂક કરવામાં આવી હતી, જે તેમની કારકિર્દીનો મોટો વળાંક સાબિત થયો. હાલમાં જ ભાજપ સંગઠનમાં થયેલા ફેરફારો બાદ, પ્રદેશ પ્રમુખ જગદીશ વિશ્વકર્મા અને યુવા મોરચાના પ્રમુખ (સાંસદ) હેમાંગ જોશીએ અંકિતા પરમારને ગુજરાત પ્રદેશ ભાજપ યુવા મોરચાના ઉપપ્રમુખ જેવી મહત્વની જવાબદારી સોંપી છે.
શિક્ષિત નેતૃત્વ અને ડિજિટલ પકડ
અંકિતા પરમાર માત્ર સોશિયલ મીડિયા ફેમ નથી, પરંતુ તેઓ શૈક્ષણિક રીતે પણ સક્ષમ છે.
- શિક્ષણ: તેમણે વડોદરાની પ્રતિષ્ઠિત મહારાજા સયાજીરાવ યુનિવર્સિટી (MSU) માંથી વાણિજ્યમાં સ્નાતક (B.Com) કર્યા બાદ LL.B (કાયદાના સ્નાતક) ની ડિગ્રી મેળવી છે. તેમની આ કાયદાકીય સમજ વહીવટી જટિલતાઓને ઉકેલવામાં અને સંગઠનમાં મજબૂત પકડ બનાવવામાં મદદરૂપ થઈ રહી છે.
- વિઝન: તેમનું લક્ષ્ય પોર વિસ્તારને 'સ્માર્ટ વિલેજ' બનાવવાનું છે. જેમાં "મારો પ્રતિનિધિ મારા દ્વારે" હેલ્પલાઇન દ્વારા પારદર્શિતા લાવવી, સ્થાનિક ઉદ્યોગોમાં કૌશલ્ય વિકાસ કેન્દ્રો સ્થાપવા અને આંગણવાડીઓનું આધુનિકીકરણ મુખ્ય છે.
સી.આર. પાટીલની 'નો-રિપીટ' થિયરીમાં ફિટ
ભાજપની 'નો-રિપીટ' થિયરી અને યુવા નેતૃત્વને પ્રાધાન્ય આપવાની નીતિમાં અંકિતા એકદમ ફિટ બેસે છે. તેમની રીલ્સ અને વીડિયો દ્વારા તેઓ સીધા જ યુવા પેઢી સાથે જોડાયેલા છે. ભાજપનો આ નિર્ણય સ્પષ્ટ કરે છે કે પક્ષ હવે પરંપરાગત રાજકારણ છોડીને ડિજિટલ અને યુવાકેન્દ્રી અભિગમ તરફ વળ્યો છે. પાર્ટી આશાવાદી છે કે એપ્રિલમાં યોજાનારી જિલ્લા અને તાલુકા પંચાયતની ચૂંટણીઓમાં અંકિતાની ફેન ફોલોઇંગ એક મોટી અસ્કયામત સાબિત થશે.