Gujarat Rain: દક્ષિણ ગુજરાતમાં મેઘરાજાએ રૌદ્ર સ્વરૂપ ધારણ કર્યું છે. વલસાડ જિલ્લા સહિત વાપી અને ઉમરગામ જેવા વિસ્તારોમાં આકાશી આફતને કારણે ચારેકોર જળબંબાકારની સ્થિતિ સર્જાઈ છે. અતિભારે વરસાદને કારણે નીચાણવાળા વિસ્તારો પૂરના પાણીમાં ગરકાવ થઈ ગયા છે. રસ્તાઓ પર નદીઓ વહેતી થઈ છે અને સોસાયટીઓ કે પાર્કિંગમાં ઊભેલી અસંખ્ય કારો છત સુધી પાણીમાં ડૂબી ગઈ છે.
વાપી-ગુંજણ, ડુંગરી ફળિયા, વાપી શહેર અને વાપી રેલવે અંડરપાસ જેવા વિસ્તારો સૌથી વધુ પ્રભાવિત થયા છે. રસ્તાઓ, હાઇવે અને ખેતરોમાં પાણી ભરાઈ જવાને કારણે ઘણા ગામોનો સંપર્ક કપાયેલો છે. વહીવટીતંત્ર પરિસ્થિતિ પર નજીકથી નજર રાખી રહ્યું છે, અને અસરગ્રસ્ત વિસ્તારોમાં બચાવ અને રાહત કામગીરી ચાલી રહી છે.
વાપીમાં સતત ત્રીજા દિવસે પણ પાણી ભરાઈ ગયા છે. પૂરના પાણી ઘરો, દુકાનો અને ઘરોમાં ઘૂસી ગયા છે, જ્યારે અનેક વાહનો આંશિક કે સંપૂર્ણપણે ડૂબી ગયા છે.
આવા મુશ્કેલ સમયે એક તરફ ઘરોમાં પાણી ઘૂસી જવાથી લોકો પરેશાન છે, તો બીજી તરફ પોતાની મોંઘીદાટ ગાડીઓ પાણીમાં ગરકાવ થઈ જતાં કાર માલિકોની ચિંતા વધી ગઈ છે. લોકોના મનમાં સૌથી મોટો સવાલ એ ઊભો થઈ રહ્યો છે કે પાણીમાં ડૂબેલી કારમાં થયેલું લાખો રૂપિયાનું નુકસાન શું ઇન્શ્યોરન્સ કંપની ચૂકવશે?
જો તમારી કાર પણ પૂર કે વરસાદના પાણીમાં ફસાઈ ગઈ છે, તો તમારે ઇન્શ્યોરન્સ ક્લેમ સંબંધિત કેટલાક મહત્વના નિયમો ખાસ જાણવા જરૂરી છે.
સામાન્ય કોમ્પ્રિહેન્સિવ ઇન્શ્યોરન્સ કેટલું રક્ષણ આપે છે?
મોટાભાગના વાહનચાલકો પાસે કોમ્પ્રિહેન્સિવ કાર ઇન્શ્યોરન્સ (Comprehensive Car Insurance) હોય છે. સામાન્ય રીતે આ પોલિસીમાં પૂર, વાવાઝોડું કે કુદરતી હોનારતથી કારની બોડી, લાઈટો અને ઈલેક્ટ્રિકલ વાયરિંગને થતું નુકસાન કવર થઈ જાય છે. પરંતુ, અહીં સૌથી મોટો પેચ 'એન્જિન'ના નુકસાનને લઈને પડે છે.
જો કારના એન્જિનમાં પાણી ઘૂસી જાય અને તેના કારણે એન્જિન સીઝ (ખરાબ) થઈ જાય, તો ઇન્શ્યોરન્સ કંપનીઓ ઘણીવાર તેને 'કન્સિક્વેન્શિયલ લોસ' (Consequential Loss - વાહન ચાલકના પોતાના નિર્ણય કે ભૂલથી થયેલું નુકસાન) ગણાવીને ક્લેમ ફગાવી દે છે. એન્જિન રિપેર કરવાનો ખર્ચ ₹50,000 થી લઈને ₹2 લાખ કે તેથી વધુ પણ થઈ શકે છે, જે તમારા ખીસ્સા પર ભારે પડી શકે છે.
એન્જિન પ્રોટેક્ટર એડ-ઓન કેમ જરૂરી છે?
જો તમે ચોમાસાની આફત અને એન્જિનના ભારેખમ ખર્ચથી બચવા માંગતા હો, તો તમારી પોલિસી સાથે 'એન્જિન પ્રોટેક્ટ એડ-ઓન' હોવું ખૂબ જ જરૂરી છે.
હાઇડ્રોસ્ટેટિક લોક (Hydrostatic Lock): જ્યારે પાણીમાં કાર ફસાયેલી હોય અને એન્જિનમાં પાણી જાય ત્યારે એન્જિન બંધ થઈ જાય છે. આ કવર હેઠળ એન્જિનના પાર્ટ્સ અને તેના રિપેરિંગનો તમામ ખર્ચ મળે છે.
ગિયરબોક્સ અને ઓઇલ લીકેજ: પાણીના કારણે ગિયરબોક્સમાં પાણી જવું કે એન્જિન ઓઇલ લીક થવાથી થતા નુકસાનને પણ આ એડ-ઓન કવર કરે છે.
કોણે ખાસ લેવું જોઈએ?
જો તમે વલસાડ, વાપી, સુરત, નવસારી, ભરૂચ કે વડોદરા જેવા દક્ષિણ અને મધ્ય ગુજરાતના વિસ્તારોમાં રહો છો, જ્યાં ચોમાસામાં અવારનવાર ભારે પાણી ભરાવાની સમસ્યા રહે છે, તો સામાન્ય ઇન્શ્યોરન્સને બદલે 'એન્જિન પ્રોટેક્ટ કવર' લેવું એક સમજદારીભર્યો નિર્ણય છે.
પાણીમાં કાર ડૂબી જાય ત્યારે ભૂલથી પણ આ ન કરો!
જો તમારી ગાડી પૂરના પાણીમાં ડૂબી ગઈ હોય, તો ક્લેમ રિજેક્ટ થવાથી બચવા માટે આ વાતોનું ખાસ ધ્યાન રાખો:
કાર ચાલુ (Start) કરવાની ભૂલ ક્યારેય ન કરવી: પાણીમાં ડૂબેલી કારને ભૂલથી પણ સેલ્ફ મારીને સ્ટાર્ટ કરવાનો પ્રયાસ ન કરો. જો તમે કાર સ્ટાર્ટ કરશો તો પાણી એન્જિનના અંદરના ભાગોમાં ખેંચાશે અને એન્જિન સીઝ થઈ જશે. કંપની આને તમારી ભૂલ ગણીને ક્લેમ નામંજૂર કરી દેશે.
ફોટો અને વીડિયો બનાવી લો: તમારી કાર જ્યાં પાણીમાં ફસાયેલી છે તેનો સ્થળ પર જ ફોટો કે વીડિયો પાડી લો, જે પુરાવા તરીકે કામ આવશે.
ઇન્શ્યોરન્સ કંપનીને તાત્કાલિક જાણ કરો: કારને જાતે ખેંચવાનો કે ગેરેજમાં લઈ જવાનો પ્રયાસ કરતા પહેલાં ઇન્શ્યોરન્સ કંપનીના ટોલ-ફ્રી નંબર પર કોલ કરીને ઘટનાની નોંધ કરાવો.
ટોઇંગ સર્વિસની મદદ લો: કંપની દ્વારા અધિકૃત ટોઇંગ વાહન દ્વારા જ કારને સર્વિસ સેન્ટર સુધી પહોંચાડો.
જાગરૂકતા અને સાચી માહિતી જ તમને ચોમાસામાં થતા મોટા આર્થિક નુકસાનથી બચાવી શકે છે.