Power Crisis in Pakistan: પાકિસ્તાનમાં ઈંધણની તીવ્ર અછતને કારણે સરકારે મંગળવારે સત્તાવાર રીતે દરરોજ 2 કલાકથી વધુના લોડશેડિંગની જાહેરાત કરી છે. વીજળીના દરમાં થતો તોતિંગ વધારો અટકાવવા માટે આ નિર્ણય લેવામાં આવ્યો છે.
પીક અવર્સમાં વીજ કાપ
પાવર ડિવિઝનના સત્તાવાર નિવેદન મુજબ, દરરોજ સાંજે 5:00 વાગ્યાથી રાત્રે 1:00 વાગ્યાના સમયગાળા દરમિયાન આશરે 2.25 કલાક માટે વીજ પુરવઠો સ્થગિત રાખવામાં આવશે. આ પગલાનો મુખ્ય હેતુ મોંઘા ઈંધણનો વપરાશ ઘટાડવાનો અને વીજળીના ટેરિફમાં થતો તીવ્ર વધારો રોકવાનો છે. પાવર ડિવિઝને સ્પષ્ટતા કરી છે કે આ પગલું લોડશેડિંગ નથી, પરંતુ સરકારની "પીક રિલીફ સ્ટ્રેટેજી" (Peak Relief Strategy) નો એક ભાગ છે.
કતારથી ગેસ પુરવઠો ખોરવાયો
આ કટોકટીનું મુખ્ય કારણ કતારથી થતી લિક્વિફાઈડ નેચરલ ગેસ (LNG) ની આયાત સ્થગિત થવી તે છે. ઈરાન પર અમેરિકા-ઈઝરાયેલ યુદ્ધ દરમિયાન ગેસ ફિલ્ડ્સ પર થયેલા હુમલા બાદ કતારે 'ફોર્સ મેજ્યુર' જાહેર કરીને પુરવઠો અટકાવી દીધો છે. ઉલ્લેખનીય છે કે કતાર પાકિસ્તાનને બે લાંબા ગાળાના કોન્ટ્રાક્ટ હેઠળ દરરોજ 1,000 મિલિયન ક્યુબિક ફીટ (mmcfd) ગેસ સપ્લાય કરે છે.
ભાવ વધારો અટકાવવા પ્રયાસ
સરકારી આંકડા મુજબ, જો આ મર્યાદિત વીજ કાપ લાગુ કરવામાં ન આવે તો આંતરરાષ્ટ્રીય સ્થિતિને કારણે વીજળીના ભાવમાં પ્રતિ યુનિટ Rs 5 થી Rs 6 નો વધારો થઈ શકે છે. જોકે, આ નવી વ્યૂહરચના હેઠળ આ વધારાને માત્ર Rs 1.5 પ્રતિ યુનિટ સુધી મર્યાદિત રાખવાનો પ્રયાસ કરવામાં આવશે. વડાપ્રધાન શહેબાઝ શરીફ આ સમગ્ર પરિસ્થિતિ પર સીધી દેખરેખ રાખી રહ્યા છે અને તેમણે નિર્દેશ આપ્યો છે કે સામાન્ય જનતા પર ભાવ વધારાનો બોજ લઘુત્તમ હોવો જોઈએ.
ગ્રાહકો માટે સૂચના
વીજ વિતરણ કંપનીઓને આદેશ આપવામાં આવ્યો છે કે તેઓ ફીડર મુજબ પાવર કટનું શિડ્યુલ ગ્રાહકો સાથે શેર કરે જેથી લોકોને વીજળી જવાના સમયની અગાઉથી જાણકારી રહે. સરકારે એમ પણ જણાવ્યું છે કે કોઈપણ બિન-આયોજિત પાવર કટ ની મંજૂરી આપવામાં આવશે નહીં. વધુમાં, ફેડરલ અને પ્રાંતીય સરકારોના સંયુક્ત પ્રયાસો અને વ્યાપારી બજારોના સમયસર બંધ થવાથી વીજળીની માંગ ઘટાડવામાં અને ખર્ચ અંકુશમાં લેવામાં મદદ મળશે.