Dahi Vada (Dahi Bhalla) Recipe: શું સ્ટ્રીટ ફૂડનું નામ સાંભળતા જ તમારા મોંમાં પાણી આવી જાય છે? ચટાકેદાર વાનગીઓના શોખીનો માટે દહીં વડા હંમેશા ફેવરિટ લિસ્ટમાં હોય છે. ઠંડુ-મીઠું દહીં, નરમ વડા અને ઉપરથી મસાલેદાર ચટણીનું મિશ્રણ આ વાનગીને ખાસ બનાવે છે. અવારનવાર આપણને એવું લાગે છે કે ઘરે બહાર જેવો સ્વાદ નથી આવતો, પરંતુ જો તમે આ સિક્રેટ રીતથી દહીં વડા બનાવશો, તો તે બજારના વડાને પણ ભુલાવી દેશે.
જરૂરી સામગ્રી
- અડદની દાળ: ૧ કપ (છોલી વગરની)
- દહીં: ૨ કપ (તાજા અને જાડા)
- લીલા મરચાં: ૧-૨ (સ્વાદ મુજબ બારીક સમારેલા)
- આદુ: ૧ ઇંચનો ટુકડો (છીણેલું)
- હિંગ: ૧/૪ ચમચી
- જીરું: ૧/૨ ચમચી
- ધાણા પાવડર: ૧/૨ ચમચી
- લાલ મરચા પાવડર: ૧/૨ ચમચી
- કાળું મીઠું: ૧/૨ ચમચી (અથવા સ્વાદ મુજબ)
- શેકેલું જીરું પાવડર: ૧/૨ ચમચી
- ચાટ મસાલો: ૧/૨ ચમચી
- ખાંડ: ૧-૨ ચમચી (દહીંમાં ભેળવવા માટે)
- મીઠું: સ્વાદ મુજબ
- તેલ: તળવા માટે
- ગાર્નિશ: બારીક સમારેલા ધાણાના પાન, દાડમના દાણા (વૈકલ્પિક)
બનાવવાની સ્ટેપ-બાય-સ્ટેપ રીત
દાળની તૈયારી અને સિક્રેટ ટિપ
સૌ પ્રથમ અડદની દાળને 4-5 કલાક અથવા આખી રાત પલાળી રાખો. ત્યારબાદ ઓછામાં ઓછા પાણીનો ઉપયોગ કરી મિક્સરમાં ઘટ્ટ પેસ્ટ બનાવી લો. દાળને પીસ્યા પછી તેને એક જ દિશામાં 5-7 મિનિટ સુધી બરાબર ફેંટો. આનાથી દાળમાં હવા ભરાશે અને વડા એકદમ નરમ અને ફૂલેલા બનશે.
વડા તળવાની રીત
એક કડાઈમાં મધ્યમ તાપે તેલ ગરમ કરો. હાથ ભીના કરી નાના-નાના વડા તેલમાં મૂકો અને ગોલ્ડન બ્રાઉન થાય ત્યાં સુધી તળો.
પાણીમાં પલાળવાની પ્રક્રિયા
તળેલા ગરમ વડાને સીધા જ હૂંફાળા મીઠાવાળા પાણીમાં નાખો. 15-20 મિનિટ પલાળવા દેવાથી વડાનું વધારાનું તેલ નીકળી જશે અને તે અંદરથી રૂ જેવા પોચા થશે.
દહીંનું મિશ્રણ
એક બાઉલમાં જાડું દહીં લો, તેમાં થોડી ખાંડ અને મીઠું ઉમેરી બરાબર ફેંટી લો જેથી તે સ્મૂધ થઈ જાય.
પીરસવાની રીત
પાણીમાંથી વડાને હળવા હાથે દબાવીને પ્લેટમાં લો. તેના પર પુષ્કળ પ્રમાણમાં તૈયાર કરેલું દહીં રેડો. હવે તેના પર લાલ મરચું, શેકેલું જીરું, કાળું મીઠું અને ચાટ મસાલો છાંટો. સ્વાદ વધારવા માટે તમે આમલીની ખાટી-મીઠી ચટણી અને લીલી ચટણી પણ ઉમેરી શકો છો. છેલ્લે દાડમ અને કોથમીરથી સજાવી ઠંડા-ઠંડા પીરસો.