Ashok Mittal ED raid: તાજેતરમાં જલંધર સ્થિત આમ આદમી પાર્ટી (AAP) ના રાજ્યસભા સાંસદ અશોક મિત્તલના નિવાસસ્થાને એન્ફોર્સમેન્ટ ડિરેક્ટોરેટ (ED) દ્વારા દરોડા પાડવામાં આવ્યા છે. આ કાર્યવાહી બુધવારે વહેલી સવારે આશરે 5:00 વાગ્યે તેમના જલંધર કેન્ટ વિસ્તારમાં આવેલા ઘરે શરૂ કરવામાં આવી હતી.
કોણ છે અશોક મિત્તલ?
અશોક મિત્તલ એક પ્રતિષ્ઠિત ઉદ્યોગપતિ અને શિક્ષણવિદ છે. તેઓ દેશની જાણીતી લવલી પ્રોફેશનલ યુનિવર્સિટી (LPU) ના ચાન્સેલર છે. આ યુનિવર્સિટી ભારતની સૌથી મોટી યુનિવર્સિટીઓમાંની એક ગણાય છે, જ્યાં 50થી વધુ દેશોના વિદ્યાર્થીઓ અભ્યાસ કરે છે. હાલમાં જ AAP દ્વારા તેમને રાજ્યસભામાં ડેપ્યુટી લીડર તરીકે નિયુક્ત કરવામાં આવ્યા છે. તેમણે આ પદ પર રાઘવ ચઢ્ઢાનું સ્થાન લીધું છે. એક સામાન્ય પરિવારમાંથી આવતા મિત્તલે શિક્ષણ અને સામાજિક ક્ષેત્રે નોંધપાત્ર પ્રગતિ કરી છે.
ચર્ચામાં રહેવાનું કારણ
અશોક મિત્તલ માત્ર તેમના શિક્ષણ કાર્ય માટે જ નહીં, પણ અરવિંદ કેજરીવાલ સાથેના ગાઢ સંબંધોને કારણે પણ જાણીતા છે. જ્યારે અરવિંદ કેજરીવાલે દિલ્હીના મુખ્યમંત્રી પદ પરથી રાજીનામું આપ્યું અને સરકારી બંગલો ખાલી કર્યો, ત્યારે અશોક મિત્તલે તેમને પોતાના બંગલામાં રહેવા માટે આમંત્રણ આપ્યું હતું. કેજરીવાલે આ આમંત્રણનો સ્વીકાર કરીને તેમના નિવાસ્થાને રહેવાનું નક્કી કર્યું હતું.
દરોડા પાછળનું સંભવિત કારણ
જોકે ED દ્વારા હજુ સુધી સત્તાવાર રીતે દરોડાનું ચોક્કસ કારણ જાહેર કરવામાં આવ્યું નથી, પરંતુ સામાન્ય રીતે ED નાણાકીય ગેરરીતિઓ અથવા મની લોન્ડરિંગના શંકાસ્પદ કેસોમાં આવી તપાસ કરતી હોય છે.
આમ આદમી પાર્ટી માટે આ એક મોટો રાજકીય ફટકો માનવામાં આવે છે, કારણ કે અશોક મિત્તલ પક્ષના મહત્વના નેતા અને મોટા ગજાના શિક્ષણવિદ છે. એક તરફ પક્ષ તેમને નવી જવાબદારીઓ સોંપી રહ્યો છે, તો બીજી તરફ તપાસ એજન્સીઓના દરોડાથી રાજકીય ગરમાવો વધી ગયો છે. આવનારા દિવસોમાં આ તપાસમાં શું બહાર આવે છે તેના પર સૌની નજર રહેશે.