India Digital Census 2027: દેશમાં વર્ષ 2027 ની વસ્તી ગણતરી માટેની તૈયારીઓ હવે યુદ્ધના ધોરણે શરૂ કરી દેવામાં આવી છે. આ વખતની વસ્તી ગણતરી અગાઉની સરખામણીએ વધુ આધુનિક, સચોટ અને સંપૂર્ણપણે ડિજિટલ હશે. આ રાષ્ટ્રીય કવાયતને સફળ બનાવવા માટે ગણતરીકારો અને સુપરવાઇઝરોને આગામી 13 એપ્રિલથી 24 એપ્રિલ દરમિયાન બ્લોક સ્તરે વિશેષ તાલીમ આપવામાં આવશે.
ઘરની આંતરિક સુવિધાઓ પર રહેશે નજર
આ વસ્તી ગણતરી માત્ર લોકોની સંખ્યા પૂરતી મર્યાદિત નથી, પરંતુ તે દેશના દરેક પરિવારના જીવનધોરણની સંપૂર્ણ 'વાર્તા' રજૂ કરશે. ગણતરીકારો જ્યારે ઘરે-ઘરે મુલાકાત લેશે, ત્યારે તેઓ ઘરની દિવાલો, છત અને ફ્લોરિંગમાં વપરાયેલી સામગ્રીથી લઈને ઘર માલિકીનું છે કે ભાડાનું, તેની પણ વિગતો નોંધશે.
- રસોડું અને બાથરૂમ: ઘરમાં અલગ રસોડું અને બાથરૂમની સુવિધા છે કે કેમ તેની નોંધ લેવાશે.
- બળતણ અને પાણી: રસોઈ માટે LPG, લાકડું કે અન્ય કયા બળતણનો ઉપયોગ થાય છે અને પીવાના પાણીનો સ્ત્રોત શું છે તેની માહિતી એકત્ર કરાશે.
- શૌચાલય: શૌચાલયની ઉપલબ્ધતા અને તેના પ્રકાર અંગે પણ પ્રશ્નો પૂછવામાં આવશે.
ડિજિટલ સંપત્તિ અને વાહનોનો હિસાબ
બદલાતા સમયની સાથે આ વખતે સરકાર નાગરિકોની ડિજિટલ પહોંચ અને સુવિધાઓનો ડેટા પણ મેળવશે. જેમાં ટેલિવિઝન, ઈન્ટરનેટ કનેક્શન, કમ્પ્યુટર, લેપટોપ અને મોબાઈલ ફોન જેવી વિગતોનો સમાવેશ થાય છે. આ ઉપરાંત, પરિવાર પાસે સાયકલ, મોટરસાયકલ કે કાર છે કે કેમ તેની પણ તપાસ કરવામાં આવશે. નોંધણી માટે એક મોબાઈલ નંબર પણ લેવામાં આવશે, જેનો ઉપયોગ માત્ર વસ્તી ગણતરીના હેતુ માટે જ થશે.
સેલ્ફ-એન્યુમરેશનનો વિકલ્પ
આ વસ્તી ગણતરીની સૌથી મોટી વિશેષતા એ છે કે નાગરિકોને તેમની વિગતો ઓનલાઈન જાતે સબમિટ કરવાનો (Self-Enumeration) વિકલ્પ પણ આપવામાં આવશે. આ પ્રક્રિયાથી ડેટા એકત્રિત કરવામાં સરળતા અને ઝડપ આવશે.
ખોટી માહિતી આપવી પડી શકે છે ભારે
અધિકારીઓના જણાવ્યા અનુસાર, વસ્તી ગણતરી કાયદો 1948 હેઠળ પૂછવામાં આવેલા તમામ 33 પ્રશ્નોના સાચા અને સચોટ જવાબો આપવા દરેક નાગરિક માટે ફરજિયાત છે. જો કોઈ વ્યક્તિ જાણીજોઈને ખોટી માહિતી આપશે અથવા સહકાર નહીં આપે, તો તેની સામે કાયદેસરની કાર્યવાહી પણ થઈ શકે છે.
કેમ મહત્વની છે આ વસ્તી ગણતરી?
એકત્રિત કરવામાં આવેલી આ માહિતી રાજ્ય અને રાષ્ટ્રીય સ્તરે શિક્ષણ, આરોગ્ય, રોજગાર અને રહેઠાણ જેવી લોકકલ્યાણની યોજનાઓ ઘડવા માટે પાયાનું કામ કરશે. આગામી દાયકા માટેની સરકારી નીતિઓ આ આંકડાઓ પર જ નિર્ભર રહેશે.