ISI Terror Module: ભારતમાં આતંકવાદનો ફેલાવો કરવા માંગતી વિદેશી તાકાતોના વધુ એક મરશિયા બોલાઈ ગયા છે. દિલ્હી પોલીસના સ્પેશિયલ સેલે ગુપ્તચર માહિતીના આધારે હાથ ધરેલા ઓપરેશનમાં તમિલનાડુના તિરુપુર અને પશ્ચિમ બંગાળમાંથી આઠ આતંકવાદીઓની ધરપકડ કરી છે. આ આતંકવાદીઓ પાસેથી નકલી દસ્તાવેજો, મહત્વના સ્થળોના વીડિયો અને આધુનિક સંચાર સાધનો મળી આવ્યા છે.
તમિલનાડુના ગાર્મેન્ટ યુનિટોમાં છુપાયેલા હતા આતંકવાદીઓ
સુરક્ષા એજન્સીઓએ તમિલનાડુના તિરુપુરમાં આવેલા વિવિધ ગાર્મેન્ટ યુનિટોમાં દરોડા પાડીને છ શંકાસ્પદોની ધરપકડ કરી છે. આ ધરપકડ તિરુપુરના જુદા જુદા વિસ્તારોમાંથી કરવામાં આવી હતી:
- ઉથુકુલી: 2 આરોપી
- પલ્લડમ: 3 આરોપી
- તિરુમુરુગનપૂંડી: 1 આરોપી
ધરપકડ કરાયેલા આરોપીઓમાં મિઝાનુર રહેમાન, મોહમ્મદ શબ્દ, ઉમર, મોહમ્મદ લિતન, મોહમ્મદ શાહિદ અને મોહમ્મદ ઉજ્જવલનો સમાવેશ થાય છે. આ પૈકી મિઝાનુર રહેમાન બાંગ્લાદેશી નાગરિક છે, જે નકલી દસ્તાવેજોના આધારે ભારતમાં રહી રહ્યો હતો. પોલીસે તેમની પાસેથી ૧૨થી વધુ સ્માર્ટફોન અને ૧૬ સિમ કાર્ડ જપ્ત કર્યા છે.
ફ્રી કાશ્મીર પોસ્ટરોએ ખોલી કાવતરાની પોલ
આ સમગ્ર મોડ્યુલનો પર્દાફાશ ત્યારે થયો જ્યારે 8 ફેબ્રુઆરીના રોજ દિલ્હીના અનેક સ્થળો અને દિલ્હી મેટ્રોમાં 'ફ્રી કાશ્મીર' (Free Kashmir) લખેલા પોસ્ટરો જોવા મળ્યા હતા. આ જ પ્રકારના પોસ્ટરો કોલકાતામાં પણ છ સ્થળોએ લગાવવામાં આવ્યા હતા. સ્પેશિયલ સેલે જ્યારે આ મામલે ઊંડી તપાસ કરી, ત્યારે જાણવા મળ્યું કે આ કોઈ સ્થાનિક વિરોધ નથી, પરંતુ વિદેશી હેન્ડલર્સના ઈશારે દેશમાં અરાજકતા ફેલાવવાનું એક સુનિયોજિત કાવતરું છે.
બે હેન્ડલર્સ દ્વારા ચાલતું હતું ઓપરેશન
તપાસમાં ચોંકાવનારી વિગતો બહાર આવી છે કે આ મોડ્યુલ બે અલગ-અલગ સ્થાનોથી નિયંત્રિત થતું હતું. એક હેન્ડલર જમ્મુ અને કાશ્મીરથી સમગ્ર કામગીરી સંભાળી રહ્યો હતો, જ્યારે બીજો હેન્ડલર બાંગ્લાદેશથી આ જૂથને સૂચનાઓ આપી રહ્યો હતો. ધરપકડ કરાયેલા આરોપીઓના ફોનમાંથી ભારતની અનેક મહત્વની ઈમારતો અને સંવેદનશીલ સ્થળોની જાસૂસી કરતા વીડિયો પણ મળી આવ્યા છે, જે સૂચવે છે કે તેઓ રેકી (Reconnaissance) પૂર્ણ કરી ચૂક્યા હતા.
નકલી આધાર કાર્ડ અને ગુપ્ત બેઠકો
પશ્ચિમ બંગાળથી પકડાયેલા બે શંકાસ્પદો પાસેથી અનેક નકલી આધાર કાર્ડ મળી આવ્યા છે. એજન્સીઓના જણાવ્યા મુજબ, આ આતંકવાદીઓ પશ્ચિમ બંગાળમાં ગુપ્ત બેઠકો કરી રહ્યા હતા જેમાં ભારતમાં વિસ્ફોટો કરવાની અને હિંસા ભડકાવવાની રણનીતિ નક્કી કરવામાં આવતી હતી. અગાઉ ફરીદાબાદમાંથી વિસ્ફોટકો મળ્યા બાદ 'લાલ કિલ્લાના ડોક્ટર્સ' નામના મોડ્યુલનો પર્દાફાશ થયો હતો, અને હવે આ 'ISI-બાંગ્લાદેશી' મોડ્યુલ પકડાતા દેશમાં મોટા હુમલાનું જોખમ ટળ્યું છે.
દિલ્હી પોલીસના જણાવ્યા અનુસાર, તમામ આરોપીઓને દિલ્હી લાવવામાં આવ્યા છે અને તેમની સઘન પૂછપરછ કરવામાં આવી રહી છે. એજન્સીઓ એ જાણવાનો પ્રયાસ કરી રહી છે કે આ જૂથને ક્યાંથી ફંડિંગ મળતું હતું અને શું કોઈ સ્થાનિક રાજકીય કે સામાજિક સંગઠનો તેમને મદદ કરી રહ્યા હતા. આ સફળતાએ સાબિત કર્યું છે કે ડિજિટલ યુગમાં સોશિયલ મીડિયા અને પોસ્ટરો દ્વારા ફેલાતી નફરત પાછળ વિદેશી આતંકવાદી એજન્સીઓનો મોટો હાથ હોઈ શકે છે.