આજનું હવામાન 07 ઓગસ્ટ 2026 | Today Weather: દેશના મોટાભાગના વિસ્તારોમાં ચોમાસું ફરી એકવાર સક્રિય બન્યું છે. જમ્મુ-કાશ્મીરથી લઈને કેરળ સુધી અનેક રાજ્યોમાં વરસાદી માહોલ જામ્યો છે. એક તરફ આસામ અને કેરળમાં પૂર જેવી ગંભીર સ્થિતિ સર્જાઈ છે, તો બીજી તરફ ઉત્તર ભારતમાં વરસાદના કારણે લોકોને ગરમીથી મોટી રાહત મળી છે. હવામાન વિભાગ (IMD) દ્વારા જાહેર કરાયેલા બુલેટિન અનુસાર, આજે દેશના 15 રાજ્યો અને કેન્દ્રશાસિત પ્રદેશોમાં ભારે વરસાદની સંભાવના છે.
આજે ગુજરાતમાં હવામાન વિભાગની આગાહી શું છે?
હવામાન વિભાગના જણાવ્યા અનુસાર, આજે ગુજરાતના વિવિધ જિલ્લાઓમાં વરસાદની સ્થિતિ નીચે મુજબ રહેશે.
- હળવાથી મધ્યમ વરસાદની શક્યતા: અરવલ્લી, પંચમહાલ, દાહોદ, મહીસાગર, વડોદરા, છોટા ઉદેપુર, નર્મદા, ભરૂચ, સુરત, ડાંગ, તાપી, નવસારી અને વલસાડ જિલ્લાના કેટલાક સ્થળોએ વરસાદ પડી શકે છે.
- છૂટાછવાયા વરસાદની સંભાવના: બનાસકાંઠા, પાટણ, મહેસાણા, સાબરકાંઠા, ગાંધીનગર, ખેડા, અમદાવાદ, આણંદ, સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદ અને કચ્છ જિલ્લામાં છૂટાછવાયા સ્થળોએ હળવો વરસાદ થઈ શકે છે.
દિલ્હી-NCRમાં હવામાન કેવું રહેશે?
દિલ્હી-NCRમાં આકાશ વાદળછાયું રહેશે અને મધ્યમ વરસાદની સંભાવનાને પગલે હવામાન વિભાગે યેલો એલર્ટ જાહેર કર્યું છે. મહત્તમ તાપમાન 33 ડિગ્રી સેલ્સિયસ અને લઘુત્તમ તાપમાન 23 ડિગ્રી સેલ્સિયસ રહેવાનો અંદાજ છે.
રાજસ્થાનમાં વરસાદની શું સ્થિતિ છે?
રાજસ્થાનમાં ચોમાસું સક્રિય થતાં છેલ્લા 24 કલાકમાં અનેક વિસ્તારોમાં ભારેથી અતિભારે વરસાદ નોંધાયો છે. ભરતપુર, જયપુર અને કોટા વિભાગમાં મધ્યમથી ભારે વરસાદની આગાહી છે. આગામી 3 દિવસ દરમિયાન ભરતપુર, જયપુર, કોટા અને ઉદયપુર વિભાગના કેટલાક જિલ્લાઓમાં ભારેથી અતિભારે વરસાદની ચેતવણી આપવામાં આવી છે.
ઉત્તર પ્રદેશ અને બિહારમાં હવામાન કેવું રહેશે?
પશ્ચિમ ઉત્તર પ્રદેશમાં વરસાદી માહોલ યથાવત રહેશે, જ્યારે પૂર્વ ઉત્તર પ્રદેશના અનેક જિલ્લાઓમાં ભારેથી અતિભારે વરસાદની શક્યતા છે. બિહારમાં પણ આગામી 2 દિવસ સુધી ભારે વરસાદની સંભાવના છે.
કેરળ અને પશ્ચિમ બંગાળમાં કેમ અપાયું એલર્ટ?
કેરળમાં સતત વરસાદને કારણે કેરળમાં સ્થિતિ ગંભીર બની છે. કાસરગોડ, કન્નુર, એર્નાકુલમ, ઇડુક્કી, કોટ્ટાયમ, અલપ્પુઝા અને પથનમથિટ્ટા જિલ્લામાં ઓરેન્જ એલર્ટ, જ્યારે અન્ય 7 જિલ્લાઓમાં યેલો એલર્ટ જાહેર કરાયું છે. માછીમારોને દરિયામાં ન જવાની સલાહ અપાઈ છે. જ્યારે દક્ષિણ બંગાળના પૂર્વ અને પશ્ચિમ મિદનાપુર તેમજ બાંકુરા જિલ્લામાં અતિભારે વરસાદ પડી શકે છે. કોલકાતા, હાવડા અને ઉપ-હિમાલયી જિલ્લાઓ જેવા કે દારજિલિંગ અને જલપાઈગુડીમાં પણ ભારે વરસાદનું એલર્ટ છે.