Arshdeep Singh Family Tree: ભારતીય ક્રિકેટ ટીમનો સ્ટાર ફાસ્ટ બોલર અર્શદીપ સિંહ આ દિવસોમાં પોતાની રમતના પ્રદર્શન કરતાં વધુ પર્સનલ લાઇફને લઈને ચર્ચામાં છે. અર્શદીપ સિંહે આખરે પોતાના સંબંધોને સત્તાવાર રીતે જાહેર કરી દીધા છે. તેણે અભિનેત્રી અને મોડલ સમરીન કૌર સાથેની તસવીરો ઇન્સ્ટાગ્રામ પર શેર કરીને છેલ્લા કેટલાક અઠવાડિયાથી ચાલી રહેલી ડેટિંગની અટકળો પર પૂર્ણવિરામ મૂકી દીધું છે.
હાલમાં જ અર્શદીપે ઇન્સ્ટાગ્રામ પર સમરીન સાથેની બે તસવીરો શેર કરી હતી, જેમાં બંને એકબીજાને પ્રેમથી ભેટતા જોવા મળે છે. તેણે તસવીરો સાથે 'My Person' લખીને પોતાના સંબંધોને પ્રથમ વખત જાહેર કર્યા હતા.
અર્શદીપ સિંહ પ્રારંભિક સફર
અર્શદીપ સિંહનો જન્મ 5 ફેબ્રુઆરી 1999ના રોજ મધ્ય પ્રદેશના ગુનામાં એક શીખ પરિવારમાં થયો હતો. તેને નાનપણથી જ ક્રિકેટમાં રસ હતો. પોતાની ધારદાર બોલિંગ અને સચોટ યોર્કરથી તે ચાહકોમાં ખૂબ લોકપ્રિય છે. તેણે જુલાઈ 2022માં ઇંગ્લેન્ડ સામે આંતરરાષ્ટ્રીય ક્રિકેટમાં ડેબ્યૂ કર્યું હતું. ડેબ્યૂ બાદ તે ભારતીય ટીમનો મહત્વપૂર્ણ ભાગ રહ્યો છે અને IPLમાં પંજાબ કિંગ્સ (Punjab Kings) તરફથી રમે છે.
અર્શદીપ સિંહના પરિવારમાં કોણ-કોણ છે?
અર્શદીપ સિંહ મૂળ પંજાબી છે, પરંતુ તેનો પરિવાર મધ્ય પ્રદેશમાં રહે છે. તેના પરિવારમાં પિતા, માતા, એક મોટો ભાઈ અને એક મોટી બહેન છે.
અર્શદીપના પિતા દર્શન સિંહ અગાઉ સેન્ટ્રલ ઇન્ડસ્ટ્રીયલ સિક્યોરિટી ફોર્સ (CISF)માં ફરજ બજાવી ચૂક્યા છે. તેઓ મધ્ય પ્રદેશના ગુનામાં CISFમાં તૈનાત હતા. બાદમાં તેમણે DCMમાં ચીફ સિક્યોરિટી ઓફિસર તરીકે પણ સેવા આપી હતી.
અર્શદીપની માતા બલજીત કૌર ગૃહિણી છે. તેઓ અનેક ઇન્ટરવ્યૂમાં પોતાના પતિ સાથે જોવા મળ્યા છે, જ્યાં બંનેએ અર્શદીપના બાળપણ, ક્રિકેટ પ્રત્યેના જુસ્સા અને સંઘર્ષ વિશે અનેક રસપ્રદ વાતો શેર કરી છે.
અર્શદીપને એક મોટો ભાઈ અને એક બહેન છે. તેના મોટા ભાઈનું નામ આકાશદીપ સિંહ છે, જે પોતાની પત્ની સાથે કેનેડામાં રહે છે. અર્શદીપની મોટી બહેનનું નામ ગુરલીન કૌર છે.
અર્શદીપ સિંહની લેડી લવ 'સમરીન કૌર' કોણ છે?
સમરીન કૌરનો જન્મ 7 સપ્ટેમ્બર 1999ના રોજ જમ્મુ-કાશ્મીરમાં થયો હતો. તે અભિનેત્રી, મોડલ અને સોશિયલ મીડિયા ઇન્ફ્લુએન્સર તરીકે જાણીતી છે. તેણે પુણેની સિમ્બાયોસિસ કોલેજ ઓફ આર્ટ્સ એન્ડ કોમર્સમાંથી B.Com (Honours)નો અભ્યાસ પૂર્ણ કર્યા બાદ મનોરંજન ક્ષેત્રમાં કારકિર્દીની શરૂઆત કરી હતી. સમરીને સૌપ્રથમ Femina Miss India 2018માં જમ્મુ-કાશ્મીરનું પ્રતિનિધિત્વ કર્યું હતું અને ફાઇનલિસ્ટ બનીને દેશભરમાં ઓળખ મેળવી હતી.
સમરીન કૌર ZEE5ની વેબ સિરીઝ 'Nail Polish'માં જોવા મળી ચૂકી છે. ઉપરાંત તેણે '83' અને 'સરદાર જી 2' જેવી ફિલ્મોમાં પણ કામ કર્યું છે. સમરીન અનેક લોકપ્રિય મ્યુઝિક વીડિયોમાં પણ જોવા મળી છે, જેમાં જુબિન નૌટિયાલ, બાદશાહ અને ગુરુ રંધાવા જેવા જાણીતા ગાયકો સાથેના પ્રોજેક્ટ્સ સામેલ છે. 'બાવલા' અને 'તુઝેં ભૂલના તો ચાહા' જેવા ગીતોએ તેને વધુ લોકપ્રિય બનાવી હતી.
કેવી રીતે શરૂ થઈ અર્શદીપ સિંહ અને સમરીન કૌરની લવ સ્ટોરી?
IPL 2026 દરમિયાન અર્શદીપ અને સમરીનના સંબંધોની ચર્ચા શરૂ થઈ હતી. સોશિયલ મીડિયા પર વાયરલ થયેલી એક સ્નેપચેટ પોસ્ટમાં અર્શદીપ એક યુવતીનો હાથ પકડેલો જોવા મળ્યો હતો, જેને ચાહકોએ સમરીન હોવાનું અનુમાન લગાવ્યું હતું. ત્યારબાદ સોશિયલ મીડિયા યુઝર્સે બંનેના ટેટૂ, કપડાં અને અન્ય તસવીરોની સરખામણી કરીને ડેટિંગની અટકળોને વધુ વેગ આપ્યો હતો.
આ ચર્ચાઓ ત્યારે વધુ તેજ બની હતી જ્યારે સમરીન પંજાબ કિંગ્સની અનેક મેચો દરમિયાન સ્ટેડિયમમાં જોવા મળી હતી. તે મુંબઈના વાનખેડે સ્ટેડિયમમાં મુંબઈ ઇન્ડિયન્સ સામેની મેચ દરમિયાન પણ હાજર હતી. ત્યારબાદ ચંદીગઢમાં યોજાયેલી મેચોમાં પણ તે ટીમને ચીયર કરતી જોવા મળી હતી. હવે અર્શદીપે જાતે જ તસવીરો શેર કરીને આ તમામ અટકળોને સત્તાવાર મહોર મારી દીધી છે.