T20 World Cup 2026: T20 વર્લ્ડ કપ 2026ની પોતાની પ્રથમ જ મેચમાં ટીમ ઇન્ડિયાએ શાનદાર પ્રદર્શન કરતા યુએસએને 29 રને હરાવ્યું છે. આ જીત માત્ર ટૂર્નામેન્ટની શરૂઆત નથી, પરંતુ એક ઐતિહાસિક સિદ્ધિ છે. ભારતે હવે ટી20 વર્લ્ડ કપના ઇતિહાસમાં સતત નવમી જીત નોંધાવીને નવો 'ઓલ ટાઈમ વર્લ્ડ રેકોર્ડ' સ્થાપિત કર્યો છે.
સૂર્યકુમાર યાદવ: સંકટ સમયની સાંકળ
વાનખેડેની ધીમી પિચ પર ટોસ હારીને પ્રથમ બેટિંગ કરવા ઉતરેલી ભારતીય ટીમની શરૂઆત અત્યંત ખરાબ રહી હતી. ટોપ ઓર્ડરના બેટ્સમેનો એકપછી એક પેવેલિયન ભેગા થતા ભારતે માત્ર 77 રનમાં 6 વિકેટ ગુમાવી દીધી હતી. જ્યારે એવું લાગતું હતું કે ભારત સસ્તામાં સમેટાઈ જશે, ત્યારે કેપ્ટન સૂર્યકુમાર યાદવે મોરચો સંભાળ્યો.
સૂર્યાએ મેદાનની ચારેબાજુ ફટકાબાજી કરી અણનમ 84 રનની આક્રમક ઇનિંગ રમી હતી. તેણે અક્ષર પટેલ (14 રન) સાથે મળીને ઇનિંગને સ્થિર કરી અને છેલ્લી 5 ઓવરોમાં તોફાની બેટિંગ કરતા ટીમને 161/9ના સન્માનજનક સ્કોર સુધી પહોંચાડી હતી. અંતિમ ઓવરમાં ભારતે 21 રન ઝૂડી કાઢ્યા હતા.
મોહમ્મદ સિરાજ અને બોલરોનો તરખાટ
162 રનના લક્ષ્યનો પીછો કરવા ઉતરેલી યુએસએની ટીમ ભારતીય બોલિંગ આક્રમણ સામે ટકી શકી નહીં. જસપ્રીત બુમરાહની ગેરહાજરીમાં મોહમ્મદ સિરાજે કમાન સંભાળી હતી. સિરાજની ધારદાર બોલિંગ અને અર્શદીપ સિંહ તથા અક્ષર પટેલની શિસ્તબદ્ધ બોલિંગને કારણે યુએસએ નિર્ધારિત ઓવરોમાં લક્ષ્યથી 29 રન દૂર રહી ગયું હતું. યુએસએની ટીમ જેણે ગત વર્લ્ડ કપમાં પાકિસ્તાનને હરાવ્યું હતું, તે આ વખતે ભારતીય સ્તરે પહોંચી શકી નહીં.
નવો વર્લ્ડ રેકોર્ડ: સતત 9મી જીત
ભારતે આ જીત સાથે ટી20 વર્લ્ડ કપમાં સતત સૌથી વધુ મેચ જીતવાનો રેકોર્ડ પોતાના નામે કર્યો છે. ભારતનો આ વિજય સિલસિલો 2024ના વર્લ્ડ કપથી શરૂ થયો હતો.
| ટીમ | સતત જીત (ટી20 વર્લ્ડ કપ) | વર્ષ |
| ભારત | 9 | 2024-2026* |
| દક્ષિણ આફ્રિકા | 8 | 2024 |
| ઓસ્ટ્રેલિયા | 8 | 2022-2024 |
| ભારત | 7 | 2012-2014 |