Churma Ladoo Recipe: ચુરમા લાડુ બનાવવાની રીત

Churma Ladoo Recipe in Gujarati: તહેવારોની સિઝન હોય અને ઘરમાં ઘી તેમજ ગોળની સુગંધ ન પ્રસરે એવું તો બને જ કેમ? ગુજરાતી ઘરોમાં જ્યારે પણ કોઈ શુભ પ્રસંગ કે ગણેશ ઉત્સવ હોય, ત્યારે બાપાના પ્રિય એવા પરંપરાગત ચુરમાના લાડુ અચૂક બનાવવામાં આવે છે. આજે અમે તમારા માટે લાવ્યા છીએ એ જ દાદી-નાનીના જમાનાનો અસલી સ્વાદ, જે મોંમાં મુકતા જ ઓગળી જશે. ચાલો જાણીએ ચુરમા લાડુ બનાવવાની રીત

ચુરમા લાડુ રેસીપી

ચુરમા લાડુ બનાવવા માટે સામગ્રી

• કરકરો ઘઉંનો લોટ – 500 ગ્રામ (લગભગ 3¼ કપ)
• ઘી – ½ કપ (મોણ માટે)
• હુંફાળું પાણી – ¾ કપ (લોટ બાંધવા માટે)
• ઘી – 300 ગ્રામ (લગભગ 1⅓ કપ, શેલો ફ્રાય કરવા માટે)
• જાયફળ – ¼ નંગ (છીણેલું)
• ગોળ – 250 ગ્રામ (લગભગ 1½ કપ, છીણેલો અથવા ભૂકો કરેલો)
• ખસખસ – જરૂર મુજબ (લાડુ પર કોટિંગ કરવા માટે)

ચુરમા લાડુ બનાવવાની રીત 

1. એક મોટા વાસણમાં કરકરો ઘઉંનો લોટ અને ઘી ઉમેરો. બંનેને હાથથી સારી રીતે મિક્સ કરો. લોટને હાથમાં દબાવો ત્યારે તે આકાર પકડે, એટલે મોણ યોગ્ય રીતે ભળ્યું છે.
2. હવે તેમાં થોડું-થોડું હુંફાળું પાણી ઉમેરીને કડક લોટ બાંધો. લોટનું પ્રમાણ વધુ હોવાથી જરૂર પડે તો તેને સમાન ભાગોમાં વહેંચીને અલગ-અલગ બાંધો. દરેક ભાગને 2થી3 મિનિટ સુધી સારી રીતે મસળો.
3. લોટ તૈયાર થઈ જાય પછી તેને ભીના કપડાથી ઢાંકી 15 મિનિટ માટે આરામ કરવા દો.
4. ત્યારબાદ લોટના નાના-નાના ભાગ કરો અને તેને હળવાશથી લાંબા, પાતળા સ્ટિક જેવા આકારમાં બનાવો. સ્ટિક ખૂબ જાડી ન બનાવવી, જેથી અંદરથી કાચી ન રહે.
5. હવે એક કડાઈમાં ધીમી આંચ પર ઘી ગરમ કરો. ઘી મધ્યમ ગરમ થાય પછી તૈયાર કરેલી સ્ટિક્સને ધીમી આંચ પર ચારેય બાજુથી શેલો ફ્રાય કરો. તે કરકરી અને સુવર્ણ રંગની થાય ત્યાં સુધી તળો. શક્ય હોય તો ઘીનું તાપમાન આશરે 140°C રાખો.
6. તળેલી સ્ટિક્સને સંપૂર્ણ ઠંડી થવા દો. પછી હાથથી તોડી મિક્સર જારમાં નાખી Pulse Mode પર દરદરી પીસી લો. જરૂર હોય તો નાના બેચમાં પીસો. ત્યારબાદ મોટા કાણાવાળી ચાલણીથી ચાળી લો.
7. હવે તેમાં ¼ જાયફળ છીણી ઉમેરો અને ચુરમા સાથે સારી રીતે મિક્સ કરો.
8. સ્ટિક્સ તળવા માટે વપરાયેલું એ જ ઘી ફરીથી મધ્યમ ગરમ કરો. તેમાં ગોળ ઉમેરો અને ગોળ સંપૂર્ણ ઓગળી જાય ત્યાં સુધી હલાવતા રહો. ગોળને વધુ સમય સુધી ન રાંધો, નહીં તો ઠંડો થયા પછી કડક થઈ જશે. અંતે થોડું પાણી છાંટી એકવાર મિક્સ કરો.
9. તૈયાર કરેલું ઓગળેલું ગોળ અને ઘી ચુરમાના મિશ્રણમાં ઉમેરો અને બરાબર મિક્સ કરો.
10. હવે મિશ્રણમાંથી જરૂરી પ્રમાણમાં ભાગ લઈને હળવા હાથે લાડુ વાળો. લાડુ બનાવતી વખતે વધુ દબાણ ન કરો, નહીં તો ઘી બહાર નીકળી શકે.
11. તૈયાર લાડુને હળવાશથી ખસખસમાં રગદોળી કોટિંગ કરો.

પીરસવાની અને સાચવવાની રીત 

સ્વાદિષ્ટ ચુરમા લાડુ તૈયાર છે. તેને એરટાઇટ ડબ્બામાં ભરી રાખો. તે 2થી3 દિવસ સુધી તાજા અને સ્વાદિષ્ટ રહે છે.