masala bhinda nu shak recipe: ઘણા લોકો ભીંડાનું સાદું શાક ખાવાનું પસંદ કરે છે, પરંતુ જો એ જ ભીંડાને મસાલેદાર ટ્વિસ્ટ આપવામાં આવે તો તેનો સ્વાદ અનેકગણો વધી જાય છે. મસાલા ભીંડાનું શાક એવી જ એક સ્વાદિષ્ટ વાનગી છે, જે રોટલી, પરાઠા કે ફૂલકા સાથે ખૂબ જ સરસ લાગે છે. ખાસ વાત એ છે કે આ શાક બનાવવા માટે બહુ ઓછી સામગ્રીની જરૂર પડે છે અને તે ખૂબ જ સરળતાથી તૈયાર થઈ જાય છે.
મસાલા ભીંડાનું શાક બનાવવા માટેની સામગ્રી
- 250 ગ્રામ ભીંડા
- 2 ટેબલસ્પૂન તેલ
- 1 ચમચી ધાણા પાવડર
- ½ ચમચી જીરુ પાવડર
- ½ ચમચી હળદર
- 1 ચમચી લાલ મરચું પાવડર
- 1 ચમચી આમચૂર પાવડર
- 2 ચમચી શેકેલો ચણાનો લોટ
- ½ ચમચી ગરમ મસાલો
- 1 ચમચી તલ
- મીઠું સ્વાદ મુજબ
- સમારેલી કોથમીર
મસાલા ભીંડાનું શાક બનાવવાની રીત
સૌપ્રથમ ભીંડાને સારી રીતે ધોઈને સંપૂર્ણપણે સુકવી લો. ત્યારબાદ દરેક ભીંડામાં લંબાઈમાં હળવો ચીરો પાડી લો.
હવે એક બાઉલમાં ધાણા પાવડર, જીરુ પાવડર, હળદર, લાલ મરચું પાવડર, આમચૂર પાવડર, ગરમ મસાલો, ચણાનો લોટ, તલ અને મીઠું ઉમેરીને મસાલો તૈયાર કરો. આ તૈયાર મસાલો ભીંડાની અંદર ભરી દો.
એક કડાઈમાં તેલ ગરમ કરો અને તેમાં ભરેલા ભીંડા ગોઠવો. ધીમા તાપે 10 થી 15 મિનિટ સુધી શેકો. વચ્ચે-વચ્ચે હળવેથી ફેરવતા રહો જેથી ભીંડા બધી બાજુથી સરખા શેકાઈ જાય. ભીંડા નરમ થઈ જાય અને મસાલો સારી રીતે ચડી જાય પછી ગેસ બંધ કરી દો.
તૈયાર મસાલા ભીંડાનું શાક ઉપરથી કોથમીર છાંટી ગરમાગરમ સર્વ કરો.
ખાસ ટીપ
મસાલા ભીંડાના શાકનો સ્વાદ વધુ વધારવા માટે મસાલામાં થોડું શિંગદાણા પાવડર ઉમેરી શકો છો. ઉપરાંત ભીંડા ધોયા પછી સારી રીતે સુકવશો તો શાક ચીકણું નહીં બને અને વધુ સ્વાદિષ્ટ લાગશે.