Google Pay UPI Circle: આજના ડિજિટલ યુગમાં રોકડ વ્યવહાર ઘટતા જાય છે અને ઓનલાઈન પેમેન્ટનું ચલણ વધતું જાય છે. આવામાં માતા-પિતા માટે સૌથી મોટી મુંઝવણ એ હોય છે કે બાળકોને પોકેટ મની કેવી રીતે આપવી? જો રોકડ આપીએ તો તેના વપરાશ પર નજર રાખવી મુશ્કેલ બને છે અને જો ડિજિટલ વ્યવહાર કરવા દઈએ તો સુરક્ષાની ચિંતા રહે છે. તમારી આ સમસ્યાનું સમાધાન લઈને આવ્યું છે Google Pay તેની નવી સુવિધા 'UPI સર્કલ' સાથે.
શું છે આ 'UPI સર્કલ' સુવિધા?
Google Pay ની આ નવી સુવિધા દ્વારા તમે તમારા પરિવારના સભ્યો, જેમ કે બાળકો કે નાના ભાઈ-બહેનોને ડિજિટલ પોકેટ મની મોકલી શકો છો. આ સુવિધાની ખાસિયત એ છે કે પૈસા બાળક વાપરશે, પરંતુ તેના પર અંતિમ નિર્ણય કે નિયંત્રણ તમારું રહેશે. તમે નક્કી કરી શકો છો કે તેઓ કેટલા પૈસા ખર્ચી શકે છે અને ક્યાં ખર્ચી રહ્યા છે તેના પર પણ નજર રાખી શકો છો.
મુખ્ય વિશેષતાઓ અને ફાયદા
- સંપૂર્ણ નિયંત્રણ: તમે દરેક પેમેન્ટને વ્યક્તિગત રીતે મંજૂર કરી શકો છો અથવા માસિક ખર્ચની મર્યાદા સેટ કરી શકો છો.
- પારદર્શિતા: ગૌણ વપરાશકર્તા (સેકન્ડરી યુઝર) ક્યાં અને કેટલા પૈસા વાપરે છે તેનો ટ્રેક રાખી શકાય છે.
- સુરક્ષા: બાળકને પોતાના બેંક એકાઉન્ટની જરૂર નથી, તે તમારા આશીર્વાદ (અને પરવાનગી) થી પેમેન્ટ કરી શકે છે.
- મર્યાદા: એક મુખ્ય વપરાશકર્તા મહત્તમ 5 ગૌણ વપરાશકર્તાઓને પોતાના સર્કલમાં ઉમેરી શકે છે.
સેટઅપ કરતા પહેલા આટલું ધ્યાન રાખો
- તમારી પાસે સક્રિય Google Pay એકાઉન્ટ અને તેની સાથે લિંક થયેલ બેંક એકાઉન્ટ હોવું જોઈએ.
- સામેની વ્યક્તિ (બાળક કે ભાઈ-બહેન) પાસે પણ Google Pay એપ હોવી જરૂરી છે.
- તેમનો મોબાઈલ નંબર તમારા કોન્ટેક્ટ લિસ્ટમાં સેવ હોવો જોઈએ.
- તેમની પાસે માન્ય UPI ID અથવા QR કોડ હોવો જોઈએ.
પોકેટ મની સેટ કરવાની રીત (સ્ટેપ-બાય-સ્ટેપ)
પ્રાથમિક સેટઅપ
Google Pay એપ ખોલી પ્રોફાઇલ આઇકન પર ક્લિક કરો. ત્યાં 'UPI સર્કલ' વિકલ્પ પસંદ કરી 'પોકેટ મની સેટ કરો' પર ટેપ કરો. જે વ્યક્તિને ઉમેરવા માંગતા હો તેમનો નંબર કે નામ પસંદ કરી કન્ફર્મ કરો.
પેમેન્ટ મોડ પસંદ કરો
અહીં તમને બે વિકલ્પો મળશે:
દરેક ચુકવણી મંજૂર કરો: બાળક જ્યારે પણ પેમેન્ટ કરશે, ત્યારે તમારી પાસે નોટિફિકેશન આવશે. તમે મંજૂરી આપશો તો જ પેમેન્ટ થશે.
માસિક મર્યાદા સેટ કરો: તમે એક ચોક્કસ રકમ (દા.ત. ₹2000) નક્કી કરી શકો છો, જેમાંથી બાળક આખા મહિના દરમિયાન ગમે ત્યારે ખર્ચ કરી શકશે.
વિગતો અને વેરિફિકેશન
જો તમે માસિક મર્યાદા પસંદ કરો છો, તો રકમ દાખલ કર્યા પછી બાળક સાથેનો તમારો સંબંધ (Relationship) પસંદ કરો. ત્યારબાદ તેમની ઓળખ માટે સરકારી ID (જેમ કે આધાર કાર્ડ) નો નંબર દાખલ કરવો પડશે. છેલ્લે, બેંક એકાઉન્ટ પસંદ કરી 'ઇન્વિટેશન' મોકલો અને તમારો UPI પિન નાખો.
ગૌણ વપરાશકર્તાનું વેરિફિકેશન
એકવાર તમે આમન્ત્રણ મોકલો, પછી તે વ્યક્તિએ પોતાની એપમાં તેને સ્વીકારવું પડશે. વેરિફિકેશન માટે તમારે સંબંધની પુષ્ટિ કરવી પડશે અને સરકારી ID ના પ્રકારની પસંદગી કરી તેને સબમિટ કરવું પડશે.
Google Pay ની આ સુવિધા વાલીઓ માટે વરદાન સમાન છે. આનાથી બાળકોમાં નાણાકીય શિસ્ત કેળવાય છે અને સાથે સાથે માતા-પિતાને પણ માનસિક શાંતિ રહે છે કે તેમના પૈસા સુરક્ષિત અને મર્યાદિત રીતે વપરાઈ રહ્યા છે. જો તમે પણ તમારા બાળકોને ડિજિટલ સાક્ષર બનાવવા માંગતા હો, તો આજે જ 'UPI સર્કલ' ટ્રાય કરો!