Monsoon ac tips: વરસાદની મોસમમાં પલળી જવું એ એક સામાન્ય વાત છે, પરંતુ ભીના શરીરે સીધા AC વાળા રૂમમાં પ્રવેશવું સ્વાસ્થ્ય માટે ઘણું જોખમી સાબિત થઈ શકે છે. અચાનક વાતાવરણ અને તાપમાન બદલાવાથી શરીરનું તાપમાન ઝડપથી ઘટી જાય છે. આ પરિસ્થિતિને કારણે શરદી, ઉધરસ, તાવ, ગળામાં અગવડતા અને સ્નાયુઓ અકડાઈ જવા જેવી શારીરિક સમસ્યાઓનો સામનો કરવો પડી શકે છે.
જોકે, ઘણીવાર ઓફિસ કે જાહેર સ્થળો પર AC સતત ચાલુ હોવાથી તેનાથી બચવું મુશ્કેલ બની જાય છે. આવા સમયે કેટલીક ખાસ સાવચેતીઓ રાખીને તમે બીમાર પડવાથી બચી શકો છો:
ભીના વસ્ત્રો અને વાળ તુરંત સુકવો
વરસાદમાં ભીંજાયા બાદ સૌથી પહેલું કામ કપડાં બદલવાનું કરો. જો કપડાં બદલવાનો વિકલ્પ ન હોય, તો શરીરને રૂમાલથી સારી રીતે લૂછી લો. ખાસ કરીને માથાના વાળ યોગ્ય રીતે કોરા કરવા અત્યંત જરૂરી છે, કારણ કે ભીના માથે ઠંડી હવામાં બેસવાથી શરદી અને માથાનો દુખાવો તુરંત પકડી લે છે.
ACનું તાપમાન સામાન્ય રાખો
પલળ્યા પછી તાત્કાલિક ACનું ટેમ્પરેચર 18°C જેવું ખૂબ નીચું ન રાખવું જોઈએ. તેના બદલે તાપમાન 25°C થી 28°C ની વચ્ચે સેટ કરો. આટલું સામાન્ય તાપમાન રૂમમાં વાતાવરણને સંતુલિત રાખે છે, જેનાથી શરીરને અચાનક ઠંડીનો આંચકો નથી લાગતો.
Dry Modeનો ઉપયોગ કરો
ચોમાસામાં વાતાવરણમાં ભેજનું પ્રમાણ વધારે હોય છે. તેથી AC ને 'Cool Mode' માં ચલાવવાને બદલે 'Dry Mode' પર રાખવું વધુ હિતાવહ છે. ડ્રાય મોડ ઓરડામાંથી વધારાનો ભેજ શોષી લે છે, જેનાથી કૂલિંગ વધુ પડતું ઠંડું લાગ્યા વિના રૂમમાં આરામદાયક વાતાવરણ જળવાઈ રહે છે.
હૂંફાળા પાણીનું સેવન કરો
ભીંજાયા પછી ફ્રિજનું કે ઠંડું પાણી પીવાનું સંપૂર્ણપણે ટાળવું જોઈએ. તેના બદલે હૂંફાળું કે ગરમ પાણી પીવો. આનાથી શરીરની અંદર ગરમાવો જળવાઈ રહેશે અને બહારની ઠંડી હવાની નકારાત્મક અસર શરીર પર ઓછી થશે.
વરસાદમાં ભીંજાયા પછી શકય હોય ત્યાં સુધી ACના સીધા પવનથી દૂર રહેવું જ હિતાવહ છે. પરંતુ જો AC વાળા વાતાવરણમાં રહેવું મજબૂરી હોય, તો ઉપર દર્શાવેલી નાની-નાની સાવધાનીઓ તમને ચોમાસામાં થતી બીમારીઓથી સુરક્ષિત રાખી શકે છે.