Gold Silver Price Prediction 2026: ભારત સરકાર પોતાની ઉર્જા જરૂરિયાતો માટે અમેરિકાથી તેલ અને ગેસની ખરીદી વધાર્યા બાદ હવે કિંમતી ધાતુઓના આયાત ક્ષેત્રે પણ મોટો ફેરફાર કરવા જઈ રહી છે. એક વરિષ્ઠ અધિકારીના જણાવ્યા અનુસાર, ભારત હવે યુનાઈટેડ આરબ અમીરાત (UAE) ને બદલે અમેરિકાથી વધુ પ્રમાણમાં સોનું અને ચાંદી મંગાવવાનું આયોજન કરી રહ્યું છે. આ ઐતિહાસિક પગલાથી ભારતીય બજારમાં સોના અને ચાંદીની કિંમતોમાં ઘટાડો થવાની પૂરેપૂરી સંભાવના છે.
વેપાર સંતુલન અને નવા બજારની શોધ
હાલમાં ભારત મુખ્યત્વે સ્વિટ્ઝર્લેન્ડ, યુએઈ, દક્ષિણ આફ્રિકા, પેરુ અને ઓસ્ટ્રેલિયાથી સોનું મંગાવે છે. અમેરિકા સોના અને ચાંદીના વેપારનું મોટું વૈશ્વિક કેન્દ્ર છે અને તે કાચા તેમજ આભૂષણ સ્વરૂપે તૈયાર ધાતુઓની મોટા પાયે નિકાસ કરે છે. આ નિર્ણય પાછળનું એક મુખ્ય કારણ અમેરિકા સાથેના વેપાર સંતુલન (ટ્રેડ સરપ્લસ) ને સંતુલિત કરવાનું પણ છે. વર્ષ 2024 માં અમેરિકામાં ભારતની કુલ નિકાસ આશરે 86.35 અબજ ડોલર રહી હતી.
કૃષિ વેપાર અને જૈવ સુરક્ષાના ધોરણો
ભારત અને અમેરિકા વચ્ચે કૃષિ ક્ષેત્રે પણ મોટો વેપાર ચાલે છે. ભારત અમેરિકાને આશરે 2.8 અબજ ડોલરના કૃષિ ઉત્પાદનોની નિકાસ કરે છે, જેની સામે 1.5 અબજ ડોલરની આયાત થાય છે. આ રીતે કૃષિ ક્ષેત્રે ભારત 1.3 અબજ ડોલરના ટ્રેડ સરપ્લસમાં છે. જોકે, ભારત સરકારે સ્પષ્ટ કર્યું છે કે અમેરિકાથી આયાત થતા કોઈ પણ કૃષિ ઉત્પાદને ભારતના જૈવ સુરક્ષા ધોરણો પૂરા કરવા પડશે, કારણ કે દેશમાં જિનેટિકલી મોડિફાઈડ (GM) ખાદ્ય પદાર્થોના વેચાણની મંજૂરી નથી.
ડેટા સેન્ટર અને ટેકનોલોજી ઉદ્યોગ માટે મોટી રાહત
ભારત અને અમેરિકા વચ્ચેનો વચગાળાનો વેપાર કરાર ભારતના ડેટા સેન્ટર ઉદ્યોગ માટે ગેમ-ચેન્જર સાબિત થઈ શકે છે. અગાઉ એન્ટરપ્રાઇઝ જીપીયુ (GPU) સર્વર પર 20 થી 28 ટકા જેટલો ઊંચો આયાત શુલ્ક લાગતો હતો, જેના કારણે ભારતમાં ડેટા સેન્ટર સ્થાપવા સિંગાપોર જેવા દેશો કરતા મોંઘા પડતા હતા. હવે ટેક્સમાં ઘટાડો થવાને કારણે જીપીયુ આધારિત ડેટા સેન્ટર સ્થાપવાની કિંમતમાં 14 ટકા સુધીનો ઘટાડો થવાની સંભાવના છે, જે આધુનિક ટેકનોલોજી અને રોકાણને પ્રોત્સાહન આપશે.
વેપાર કરારથી વિવિધ ઉદ્યોગોને ફાયદો
આ દ્વિપક્ષીય સમજૂતી હેઠળ આશરે 30 અબજ ડોલરની નિકાસ પર લાગતો ટેક્સ 50 ટકાથી ઘટાડીને 18 ટકા કરવામાં આવ્યો છે, જ્યારે 2 અબજ ડોલરની નિકાસ પરનો ટેક્સ સંપૂર્ણપણે નાબૂદ (શૂન્ય) કરવામાં આવ્યો છે. આનાથી ટેક્સટાઇલ, લેધર, રત્ન અને આભૂષણ, કૃષિ મશીનરી, હોમ ડેકોર અને ફાર્માસ્યુટિકલ જેવા ઉદ્યોગોને આંતરરાષ્ટ્રીય બજારમાં વધુ સ્પર્ધાત્મક બનવામાં મદદ મળશે. આ કરારથી ભારતીય ઉત્પાદનો અમેરિકન બજારમાં સરળતાથી અને સસ્તા દરે પહોંચી શકશે.