First Hybrid ETF in India: મિરે એસેટ ઇન્વેસ્ટમેન્ટ મેનેજર્સ (ઇન્ડિયા) પ્રાઇવેટ લિમિટેડ દ્વારા ભારતીય મ્યુચ્યુઅલ ફંડ માર્કેટમાં બે નવી ન્યૂ ફંડ ઓફર (NFOs) રજૂ કરવામાં આવી છે. આ ઓફર્સ હેઠળ દેશનું સર્વપ્રથમ હાઇબ્રિડ ETF અને પ્રથમ સ્માર્ટ બીટા આધારિત હાઇબ્રિડ ઇન્ડેક્સ ફંડ લોન્ચ કરવામાં આવ્યા છે. રોકાણકારો માટે આ બંને ફંડના NFO સબસ્ક્રિપ્શન 10 જુલાઈ, 2026ના રોજ ખુલ્યુ અને 22 જુલાઈ, 2026ના રોજ બંધ થશે. ત્યારબાદ, ETF ફંડ 28 જુલાઈ, 2026થી અને ઇન્ડેક્સ ફંડ 29 જુલાઈ, 2026થી નિયમિત ટ્રેડિંગ માટે ફરી ખુલશે.
બંને ફંડની મુખ્ય વિશેષતાઓ અને રોકાણ વ્યૂહરચના
આ બંને ન્યૂ ફંડ ઓફર એક સરખા ઇક્વિટી અને ડેટ માળખા પર આધારિત છે, પરંતુ તેમાં રોકાણની ફાળવણીની ટકાવારી અલગ-અલગ રાખવામાં આવી છે:
મિરે એસેટ નિફ્ટી 200 મોમેન્ટમ 30 પ્લસ 8-13 યર G-Sec 50:50 ETF: આ એક ઓપન-એન્ડેડ એક્સચેન્જ ટ્રેડેડ ફંડ છે, જે નિફ્ટી 200 મોમેન્ટમ 30 પ્લસ 8-13 યર G-Sec 50:50 ઇન્ડેક્સને ટ્રેક કરે છે. આ સ્માર્ટ બીટા બેલેન્સ્ડ હાઇબ્રિડ ETF છે, જે ઇક્વિટી અને ડેટ બંને એસેટ ક્લાસમાં 50:50 ટકા સમાન રોકાણ કરીને સંતુલિત પોર્ટફોલિયો જાળવવાનું લક્ષ્ય રાખે છે.
મિરે એસેટ નિફ્ટી 200 મોમેન્ટમ 30 પ્લસ 8-13 યર G-Sec 75:25 ઇન્ડેક્સ ફંડ: આ એક ઓપન-એન્ડેડ ઇક્વિટીલક્ષી હાઇબ્રિડ ઇન્ડેક્સ ફંડ છે, જે નિફ્ટી 200 મોમેન્ટમ 30 પ્લસ 8-13 યર G-Sec 75:25 ઇન્ડેક્સનું અનુકરણ કરે છે. તેમાં 75 ટકા હિસ્સો ઇક્વિટીમાં અને બાકીનો 25 ટકા હિસ્સો ડેટમાં રોકાણ કરવામાં આવશે. આ ફંડનો અભિગમ પ્રમાણમાં વધારે આક્રમક છે અને તે વધુ જોખમ ધરાવે છે.
જોખમ અને વળતરનું સંતુલન
બંને સ્કીમમાં ઇક્વિટી રોકાણનો ભાગ 'નિફ્ટી 200 મોમેન્ટમ 30 ઇન્ડેક્સ' મુજબ સંચાલિત થશે, જે એક સ્માર્ટ બીટા વ્યુહરચના છે. આ વ્યૂહરચના હેઠળ તાજેતરમાં જોખમ સામે સારું વળતર આપનારા ક્વોલિટી સ્ટોક્સ પસંદ કરવામાં આવે છે. ડેટ સેગમેન્ટનું રોકાણ 'નિફ્ટી 8-13 યર G-Sec ઇન્ડેક્સ' પર આધારિત રહેશે, જે કોઈપણ પ્રકારના ક્રેડિટ રિસ્ક વિના મૂડીને સુરક્ષા પ્રદાન કરવાનો પ્રયત્ન કરે છે, જોકે તેમાં સમયગાળો લાંબો હોય છે.
મિરે એસેટના ETF પ્રોડક્ટ હેડ અને ફંડ મેનેજર સિદ્ધાર્થ શ્રીવાસ્તવના જણાવ્યા અનુસાર, ઇક્વિટી અને ડેટનું આ અનોખું મિશ્રણ સ્થિરતા સાથે લાંબા ગાળાની વૃદ્ધિ આપવાના ઉદ્દેશ્યથી તૈયાર કરાયું છે. ઇક્વિટી સેગમેન્ટ બજારની તેજીનો લાભ લેવા માટે આક્રમક અભિગમ રાખે છે, જ્યારે ડેટ સેગમેન્ટ બજારની વધઘટ અને જોખમોને નિયંત્રિત કરવાનું કામ કરે છે. રોકાણકારો પોતાની જોખમ લેવાની ક્ષમતા મુજબ સંતુલિત (ETF) અથવા ઇન્ડેક્સ ફંડ વિકલ્પ પસંદ કરી શકે છે.
રીબેલેન્સિંગ, ટેક્સેશન અને રોકાણની વિગતો
આ ફંડ્સમાં ઇક્વિટી અને ડેટનો હિસ્સો દર મહિને રિસેટ કરવામાં આવશે, જ્યારે મૂળભૂત ઇક્વિટી પોર્ટફોલિયોનું પુનર્ગઠન દર છ મહિને નિયમ આધારિત પદ્ધતિથી થશે. આ ચોક્કસ ફોર્મ્યુલાને કારણે ફંડનું પરિણામ ફંડ મેનેજરની મરજીથી ચાલતા અન્ય સામાન્ય હાઇબ્રિડ ફંડ્સ કરતા વધુ અનુમાનિત રહી શકે છે.
આ ઉપરાંત, હાઇબ્રિડ ETF સ્ટોક એક્સચેન્જ પર લિસ્ટ થવાનું હોવાથી રોકાણકારોને બજારના સમય દરમિયાન રિયલ-ટાઇમ અને ઇન્ટ્રાડે ભાવો પર યુનિટ્સ ખરીદવા-વેચવાની લિક્વિડિટી મળશે. આ ટેક્સેશનના વર્તમાન નિયમો મુજબ, જો રોકાણકાર આ ETF યુનિટ્સ એક વર્ષથી વધુ સમય માટે રાખશે, તો તેમને લોન્ગ ટર્મ કેપિટલ ગેઇન્સ (LTCG) ટેક્સનો લાભ મળી શકે છે.
આ NFO હેઠળ રોકાણ શરૂ કરવા માટે લઘુત્તમ પ્રારંભિક રોકાણ રૂ. 5,000/- નક્કી કરવામાં આવ્યું છે, અને ત્યારબાદ રૂ. 1 ના ગુણાંકમાં ગમે તેટલી રકમ ઉમેરી શકાશે. આ બંને ફંડ્સનું સંચાલન સંયુક્ત રીતે સુશ્રી એકતા ગાલા અને સુશ્રી પ્રણવી કુલકર્ણી દ્વારા કરવામાં આવશે. રોકાણ કરતા પહેલા રોકાણકારોએ પોતાની નાણાકીય સ્થિતિ અને બજારના જોખમોને ધ્યાનમાં લેવા જરૂરી છે.
નોંધ : આ માત્ર તમારી જાણકારી માટે છે. ગુજરાતી જાગરણ કોઈ રોકાણની સલાહ આપતું નથી. રોકાણ કરતા પહેલા નિષ્ણાંતની સલાહ લો.