Gauri Vrat 2026: શહેરમાં ગૌરી વ્રત અને જયા-પાર્વતી વ્રતના જાગરણ નિમિત્તે અમદાવાદ મ્યુનિસિપલ કોર્પોરેશન (AMC) દ્વારા વ્રતધારી મહિલાઓ, બાલિકાઓ અને તેમની સાથે આવનારા બાળકો માટે ખાસ આયોજન કરવામાં આવ્યું છે. વ્રત કરનાર બહેનો ધાર્મિક પરંપરાનું આનંદપૂર્વક પાલન કરી શકે તે હેતુથી સાબરમતી રિવરફ્રન્ટના ગાર્ડન અને કાંકરિયા લેક ફ્રન્ટ ખાતે નિર્ધારિત સમય સુધી મફત પ્રવેશ, પૂરતી સુરક્ષા વ્યવસ્થા અને સાંસ્કૃતિક કાર્યક્રમોનું આયોજન કરવામાં આવ્યું છે. મહિલાઓની સુરક્ષાને ધ્યાનમાં રાખીને બંને સ્થળોએ 12 વર્ષથી વધુ ઉંમરના છોકરાઓ અને પુરુષોના પ્રવેશ પર સંપૂર્ણ પ્રતિબંધ રહેશે.
ગૌરી વ્રત અને જયા-પાર્વતી વ્રતના જાગરણનો સમય અને પ્રવેશ નિયમો શું છે?
આ પણ વાંચો
ગૌરી વ્રત (તા. 29 જુલાઈ 2026, બુધવાર) અને જયા-પાર્વતી વ્રત (તા. 31 જુલાઈ 2026, શુક્રવાર) નિમિત્તે સમય અને પ્રવેશ અંગેની વ્યવસ્થા નીચે મુજબ રહેશે:
- ગૌરી વ્રત (29-07-2026): સાબરમતી રિવરફ્રન્ટ અને કાંકરિયા લેક ફ્રન્ટ ખાતે રાત્રિના 12:00 વાગ્યા સુધી વ્રતધારી મહિલાઓ, બાલિકાઓ અને તેમની સાથેના બાળકોને મફત પ્રવેશ મળશે.
- જયા-પાર્વતી વ્રત (31-07-2026): સાબરમતી રિવરફ્રન્ટ ખાતે રાત્રિના 10:00 વાગ્યાથી અને કાંકરિયા લેક ફ્રન્ટ ખાતે રાત્રિના 8:00 વાગ્યાથી લઈને તા. 01 ઓગસ્ટ 2026ના રોજ સવારે 3:00 વાગ્યા સુધી મફત પ્રવેશ આપવામાં આવશે.
- પુરુષો માટે પ્રવેશ નિષેધ: બંને વ્રત દરમિયાન 12 વર્ષથી વધુ ઉંમરના છોકરાઓ અને પુરુષોને પ્રવેશ આપવામાં આવશે નહીં.
સાબરમતી રિવરફ્રન્ટ ખાતે કઈ વિશેષ વ્યવસ્થાઓ કરવામાં આવી છે?
બાયોડાયવર્સિટી પાર્ક અને અટલબ્રિજ વિસ્તાર સિવાય રિવરફ્રન્ટના તમામ ગાર્ડન ખુલ્લા રહેશે. રાત્રિના 10:00 વાગ્યા પછી સામાન્ય મુલાકાતીઓ માટે ગાર્ડન બંધ કરી માત્ર વ્રત કરનાર બહેનોને જ પ્રવેશ અપાશે.
જયા-પાર્વતી વ્રત દરમિયાન પૂર્વ બાજુ આવેલા સુભાષબ્રિજ ગાર્ડન ખાતે મહિલાઓ અને બાલિકાઓ ગરબાનો આનંદ માણી શકે તે માટે વિશેષ વ્યવસ્થા તેમજ સાંસ્કૃતિક કાર્યક્રમનું આયોજન કરવામાં આવ્યું છે.
કાંકરિયા લેક ફ્રન્ટ ખાતે મુલાકાતીઓ માટે શું સુવિધાઓ રહેશે?
કાંકરિયા લેક ફ્રન્ટ ખાતે રાત્રિના 8:00 વાગ્યાથી તમામ રિક્રિએશન પ્રવૃત્તિઓ અને નગીનાવાડીના મુખ્ય દરવાજા મુલાકાતીઓ માટે ખુલ્લા રહેશે. જોકે, પ્રાણીસંગ્રહાલય (ઝૂ) સાંજે 7:00 વાગ્યાથી બંધ રહેશે.
સાંજે 7:30 થી 8:00 વાગ્યા સુધી રિશેષનો સમય રહેશે, ત્યારબાદ વ્રતધારીઓ માટે મફત પ્રવેશ શરૂ થશે. અહીં પણ બહેનોના મનોરંજન માટે સાંસ્કૃતિક કાર્યક્રમ યોજાશે.
મહિલાઓ અને બાલિકાઓની સુરક્ષા માટે કેવો બંદોબસ્ત ગોઠવાયો છે?
- સુરક્ષા ગાર્ડની તૈનાતી: સાબરમતી રિવરફ્રન્ટના તમામ ગાર્ડનોમાં નિયમિત સુરક્ષા ઉપરાંત પુરુષ અને મહિલા સિક્યુરિટી ગાર્ડનો પૂરતો બંદોબસ્ત ગોઠવવામાં આવ્યો છે.
- કાંકરિયા ખાતે વિશેષ સુરક્ષા: કાંકરિયા લેક ફ્રન્ટ પર નિયમિત ગાર્ડ ઉપરાંત વધારાના 40 મહિલા સુરક્ષા ગાર્ડ તૈનાત રહેશે.
- પોલીસ બંદોબસ્ત: શહેર પોલીસ વિભાગ દ્વારા મહિલા પોલીસ કર્મીઓ સહિત પૂરતો પોલીસ કાફલો બંને સ્થળોએ સુરક્ષા વ્યવસ્થા સંભાળશે.