Anand News: આણંદ જિલ્લામાં મોડી રાત્રે ખંભોળજ-સારસા રોડ પર ભયાનક ટ્રિપલ અકસ્માત સર્જાયો હતો. બાઈક, કાર અને બસ વચ્ચે થયેલા આ અકસ્માતમાં એક બાઈક સવારનું ઘટનાસ્થળે જ મોત થયું હતું. અકસ્માતના આ બનાવમાં બસની ટક્કર બાદ ક્રૂઝર કાર રોડની બાજુમાં આવેલી લાઇટની ડીપીમાં જઈ અથડાઈ હતી. જ્યારે બાઈક સવાર ટક્કર બાદ ફંગોળાઈને નજીક આવેલા પેટ્રોલ પંપ પાસે પટકાયો હતો.
પ્રાથમિક માહિતી મુજબ મોડી રાત્રે ખંભોળજ તરફથી સારસા જતી બાઈકને આગળથી આવી રહેલી ખાનગી ટ્રાવેલ્સની બસે જોરદાર ટક્કર મારી હતી. બસની પાછળ આવતી ક્રૂઝર કાર અચાનક બ્રેક લગાવતા સંતુલન ગુમાવી બાજુની ડીપીમાં ઘૂસી ગઈ હતી. અકસ્માત એટલો વિકટ હતો કે બાઈકના ભાગો દૂર સુધી છુટા પડ્યા હતા અને આસપાસના લોકો દોડી આવ્યા હતા.
ઘટનાની જાણ થતાં જ ખંભોળજ પોલીસ ઘટના સ્થળે દોડી આવી હતી અને મૃતદેહને કબ્જે લઈને પોસ્ટમોર્ટમ માટે ખંભોળજ સરકારી હોસ્પિટલ ખસેડાયો હતો. હજી સુધી બાઈક સવારની ઓળખ થઈ નથી. પોલીસે અકસ્માત અંગેનું વધુ અનુસંધાન શરૂ કર્યું છે.
આ પણ વાંચો
આ અકસ્માતનો સમગ્ર દ્રશ્ય નજીકના પેટ્રોલ પંપમાં લગાવેલી CCTV કેમેરામાં કેદ થયો છે. જેમાં બસ, ક્રૂઝર અને બાઈક વચ્ચેની ટક્કર અને બાદમાં સર્જાયેલા અફરાતફરીના દ્રશ્યો સ્પષ્ટ જોવા મળે છે. અકસ્માતને કારણે રોડ પર ટ્રાફિક જામ સર્જાયો હતો, જેને પોલીસે નિયંત્રણમાં લીધો હતો.
ખંભોળજ-સારસા રોડ પર સતત વધી રહેલા ભારે વાહન પરિવહન અને અંધારા વિસ્તારોમાં લાઇટિંગની અછતને કારણે અકસ્માતોની સંખ્યા વધી રહી છે, જેના કારણે સ્થાનિકો દ્વારા માર્ગ સુરક્ષા માટે વધારાની વ્યવસ્થા કરવાની માગ ઉઠી છે.