Bhavnagar Police Raid Spa Center: ભાવનગર પોલીસ દ્વારા કરવામાં આવેલી કાર્યવાહીથી શહેરના સ્પા સંચાલકોમાં ફફડાટ ફેલાયો છે. આજે શહેરના 4 સ્પા સેન્ટર પર પોલીસે દરોડા પાડ્યા હતા. જેમાં વાઘાવાડી રોડ પર અને સુરભી મોલમાં આવેલા સ્પા સેન્ટર સહિત મનપા કચેરી સામે આવેલા સ્પા સેન્ટરમાં પણ દરોડા પાડ્યા હતા. આ રેડ દરમિયાન કુલ 7 મહિલાને બચાવાઈ છે. જ્યારે 2 ગ્રાહક અને એક મેનેજરની અટકાયત કરવામાં આવી છે.
આ અંગે મળતી વિગત અનુસાર, ગુપ્ત માહિતીના આધારે પોલીસે ટીમ બનાવી અલગ અલગ સ્થળ પર દરોડા પાડ્યા હતા. જેમાં શહેરના વાઘાવાડી રોડ પર આવેલા ઇવા સુરભી મોલમાં ચાલતા કેટલાક સ્પા સેન્ટર પર તપાસ હાથ ધરી હતી. આ કાર્યવાહી દરમિયાન કેટલીક શંકાસ્પદ હલચલ જોવા મળતા પોલીસે વિગતવાર પૂછપરછ હાથ ધરી છે.
આ પણ વાંચો: સસ્પેન્ડેડ કોન્સ્ટેબલ નયના બારૈયાએ કર્યો આપઘાતનો પ્રયાસ, DySP રીમા વિરૂદ્ધ કર્યા ગંભીર આક્ષેપ
સુરભી મોલમાં કાર્યરત આયુર થાઈ સ્પા અને અરોમા ફેમિલી સ્પા સેન્ટર પર પોલીસે દરોડા પાડ્યા હતા. તપાસ દરમિયાન નિયમોના ભંગ અને શંકાસ્પદ પ્રવૃત્તિ સામે આવતા કાયદેસરની કાર્યવાહી કરવામાં આવી છે. પોલીસે સ્થળ પરથી 7 મહિલાઓને બચાવી હતી. જ્યારે બે ગ્રાહકો અને એક મેનેજરને ઝડપી પાડ્યા હતા. હાલ તમામની ઓળખ, દસ્તાવેજો અને પરમિટની તપાસ કરવામાં આવી રહી છે.
પોલીસ ટીમો દ્વારા શહેરના પટાયા ફેમિલી સ્પા અને ક્રિસ્ટલ સ્પા સેન્ટર જેવા અન્ય સ્પા સેન્ટરોમાં પણ દરોડા પાડવામાં આવ્યા. પોલીસનો દાવો છે કે કેટલાક સેન્ટરોમાં કાયદેસરની મંજૂરી વિના સેવાઓ આપવામાં આવી રહી હતી. પોલીસ ટીમોએ તમામ સ્થળો પરથી રજીસ્ટર, CCTV ફૂટેજ અને સ્ટાફની વિગતો કબજે લેવામાં આવી છે. આગળની તપાસના આધારે વધુ કાનૂની પગલાં લેવામાં આવશે.
આ ઓપરેશનમાં નિલમબાગ પોલીસ, ઘોઘારોડ પોલીસ અને એન્ટી હ્યુમન ટ્રાફિકિંગ યુનિટના અધિકારીઓ સામેલ થયા હતા. પોલીસના જણાવ્યા અનુસાર, સ્પાની આડમાં કોઈપણ પ્રકારની અનૈતિક પ્રવૃત્તિ ચલાવી લેવામાં આવશે નહીં. હાલ પકડાયેલા શખ્સો વિરુદ્ધ કાયદેસરની કાર્યવાહી હાથ ધરવામાં આવી છે. આ નેટવર્ક પાછળ અન્ય કોણ સંડોવાયેલું છે તેની તપાસ ચાલુ છે.