Jamnagar News: જામનગર શહેરના સંવેદનશીલ ગણાતા બેડી વિસ્તારમાં ગત મોડી રાત્રે અચાનક વાતાવરણ તંગ બની ગયું હતું. કોઈ નજીવી અને અગમ્ય કારણોસર બે જૂથો આમને-સામને આવી જતા જોતજોતામાં મામલો ઉગ્ર બન્યો હતો અને રસ્તા પર છુટ્ટા પથ્થરોનો મારો શરૂ થઈ ગયો હતો. આ ઘટનાને પગલે સમગ્ર વિસ્તારમાં ભય અને તંગદિલીનો માહોલ સર્જાયો છે અને હાલ વિસ્તારમાં ભારેલા અગ્નિ જેવી સ્થિતિ જોવા મળી રહી છે.
સામાન્ય બોલાચાલીએ લીધું ઉગ્ર સ્વરૂપ ધારણ કર્યું
પ્રાપ્ત વિગતો મુજબ, બેડી વિસ્તારમાં મોડી રાત્રે બે જૂથો વચ્ચે સામાન્ય બાબતે બોલાચાલી શરૂ થઈ હતી. શરૂઆતમાં મૌખિક દલીલબાજી થઈ, પરંતુ બંને પક્ષે ઉગ્ર વલણ અપનાવતા પરિસ્થિતિ કાબૂ બહાર જતી રહી હતી. બોલાચાલીએ થોડી જ વારમાં મારામારીનું ઉગ્ર સ્વરૂપ ધારણ કરી લીધું હતું, અને બંને પક્ષે એકબીજા પર છુટ્ટા પથ્થરોનો મારો શરૂ કરી દેવામાં આવ્યો હતો. મોડી રાત્રે અચાનક સર્જાયેલા આ ધિંગાણાને કારણે સ્થાનિક રહીશોમાં મોટો ફફડાટ ફેલાઈ ગયો હતો.
સોશિયલ મીડિયામાં વાયરલ થયા લાઈવ દ્રશ્યો
આ જૂથ અથડામણ અને પથ્થરમારાના ભયાનક દ્રશ્યો ત્યાં હાજર સીસીટીવી કેમેરામાં કેદ થયા હતા. ગત રાતથી જ આ ઘટનાના વીડિયો સોશિયલ મીડિયા પ્લેટફોર્મ પર તીવ્ર ગતિએ વાયરલ થઈ રહ્યા છે. વીડિયોમાં સ્પષ્ટપણે જોઈ શકાય છે કે કઈ રીતે બે ટોળાં આક્રમકતા સાથે એકબીજા પર પથ્થરમારો કરી રહ્યા છે, જેના કારણે વિસ્તારમાં અફરાતફરી અને દોડધામ મચી ગઈ હતી. પથ્થરમારાના આ લાઇવ દ્રશ્યો વાયરલ થતાં સમગ્ર શહેરમાં ચકચાર મચી ગઈ છે.
ઘટનાને પગલે સ્થાનિકોએ તાત્કાલિક પોલીસને જાણ કરી હતી, જોકે પોલીસ ઘટનાસ્થળે પહોંચે ત્યાં સુધી બંને જૂથો છૂટા પડી ગયા હતા. હાલમાં કોઈ જાનહાનિના સમાચાર નથી, પરંતુ પથ્થરમારામાં કેટલાક વાહનો અને દુકાનોને નુકસાન થયું હોવાની શક્યતા છે.
ચુસ્ત પોલીસ બંદોબસ્તની માંગ
બેડી વિસ્તારને અગાઉથી જ સંવેદનશીલ ગણવામાં આવે છે, ત્યારે સામાન્ય બોલાચાલીમાં આ પ્રકારે પથ્થરમારો થવાથી સ્થાનિકોમાં સલામતી અંગે ગંભીર ચિંતા વ્યક્ત થઈ રહી છે. હાલ વિસ્તારમાં શાંતિ જળવાઈ રહે અને વધુ કોઈ અનિચ્છનીય બનાવ ન બને તે માટે પોલીસ દ્વારા તાત્કાલિક પેટ્રોલિંગ વધારવા અને ચુસ્ત બંદોબસ્ત ગોઠવવાની માંગ ઉઠી છે. પોલીસ દ્વારા વીડિયોના આધારે તપાસ હાથ ધરીને આરોપીઓને ઝડપી પાડવાની અને કાયદેસરની કાર્યવાહી કરવાની તજવીજ શરૂ કરવામાં આવી છે.