Attack on young boy in Morbi: મિત્રતામાં વેરભાવ અને નજીવી વાતે હિંસાની ઘટનાઓ વધી રહી છે. ત્યારે મોરબીના પાનેલી ગામેથી એક ચોંકાવનારો કિસ્સો સામે આવ્યો છે. માત્ર "તું બાઈક ચલાવીને આગળ કેમ નીકળી ગયો?" તેટલી નાની વાતમાં ચાર મિત્રોએ ભેગા મળીને એક 18 વર્ષીય યુવાનને ધોકા અને પાઇપ વડે બેરહેમ માર માર્યો હતો.
નજીવી બાબતે ઉશ્કેરાયા મિત્રો
મળતી માહિતી મુજબ, પાનેલી ગામમાં રહેતા અને મજૂરી કામ કરી ગુજરાન ચલાવતા 18 વર્ષીય જેન્તીભાઈ રાજેશભાઈ કટેશિયા ગતરોજ પોતાના મિત્રો સાથે બાઇક લઈને જઈ રહ્યા હતા. આ દરમિયાન જેન્તીભાઈ પોતાનું બાઈક લઈને આગળ નીકળી જતાં અન્ય મિત્રો ઉશ્કેરાયા હતા.
ચાર મિત્રો ધોકા અને પાઈપ સાથે તૂટી પડ્યા
જ્યારે યુવાન જેન્તી પાનની દુકાને જઈ રહ્યો હતો, ત્યારે જ તેના મિત્રોએ તેને આંતર્યો હતો અને "તું અમારી આગળ કેમ નીકળી ગયો?" તેમ કહી ઝઘડો શરૂ કર્યો હતો. વાત વણસતા ચાર શખ્સોએ હુમલો કરી દીધો હતો. આરોપીઓએ ધોકા અને પાઇપ વડે યુવકને બેરહેમ માર માર્યો હતો.
યુવક ઈજાગ્રસ્ત થયો, પોલીસ ફરિયાદ નોંધાઈ
આ હુમલામાં જેન્તીભાઈને શરીરે ગંભીર ઈજાઓ પહોંચતા તાત્કાલિક સરકારી હોસ્પિટલ ખાતે ખસેડવામાં આવ્યા હતા. ઘટનાની જાણ થતાં જ પોલીસ કાફલો હોસ્પિટલ દોડી ગયો હતો અને યુવાનનું નિવેદન નોંધ્યું હતું. મોરબી તાલુકા પોલીસે આ મામલે ગુનો નોંધી આરોપીઓને ઝડપી પાડવા ચક્રો ગતિમાન કર્યા છે.