Morbi Rain: મોરબી જિલ્લામાં છેલ્લા 24 કલાક દરમિયાન મેઘરાજાએ ધમાકેદાર ઇનિંગ રમી છે, જેના કારણે સમગ્ર જિલ્લામાં સાર્વત્રિક વરસાદી માહોલ જોવા મળી રહ્યો છે. સ્ટેટ ઇમરજન્સી ઓપરેશન સેન્ટર દ્વારા 25 જુલાઈ 2026 ના રોજ સવારે 06:00 વાગ્યા સુધીના પૂરા થતા 24 કલાકના જાહેર કરાયેલા આંકડા મુજબ, જિલ્લાના પાંચેય તાલુકાઓમાં નોંધપાત્ર વરસાદ નોંધાયો છે.
વાંકાનેરમાં મેઘતાંડવ: 7 ઇંચ વરસાદ
મોરબી જિલ્લામાં સૌથી વધુ વરસાદ વાંકાનેર તાલુકામાં નોંધાયો છે. વાંકાનેરમાં છેલ્લા 24 કલાકમાં 176 મિલીમીટર એટલે કે 6.93 ઇંચ જેટલો અનરાધાર વરસાદ ખાબક્યો છે. ભારે વરસાદને કારણે વાંકાનેરના નીચાણવાળા વિસ્તારોમાં પાણી ભરાઈ ગયા છે અને સ્થાનિક નદી-નાળાઓમાં નવા નીરની આવક થઈ છે.
મોરબી અને માળિયામાં 4 ઇંચથી વધુ વરસાદ
જિલ્લા મથક મોરબી અને માળિયા તાલુકામાં પણ મેઘરાજાએ મન મૂકીને બેટિંગ કરી છે. મોરબી તાલુકામાં છેલ્લા 24 કલાકમાં 112 મિલીમીટર (4.41 ઇંચ) વરસાદ નોંધાયો છે. તેવી જ રીતે માળિયા તાલુકામાં પણ 103 મિલીમીટર (4.06 ઇંચ) વરસાદ પડ્યો છે. આ બંને તાલુકાઓમાં 4 ઇંચથી વધુ વરસાદને કારણે રસ્તાઓ પર પાણી ફરી વળ્યા છે અને જનજીવન પ્રભાવિત થયું છે.
હળવદ અને ટંકારામાં પણ મેઘમહેર
જિલ્લાના અન્ય તાલુકાઓની સ્થિતિ જોઈએ તો હળવદમાં 54 મિલીમીટર (2.13 ઇંચ) વરસાદ નોંધાયો છે. જ્યારે ટંકારા તાલુકામાં પણ મેઘરાજાની પધરામણી થઈ છે, જ્યાં 42 મિલીમીટર (1.65 ઇંચ) વરસાદ નોંધાયો છે.
મોરબી જિલ્લામાં વરસી રહેલા આ સાર્વત્રિક વરસાદને પગલે ખેડૂતોમાં ભારે ઉત્સાહ અને આનંદની લહેર જોવા મળી રહી છે. વરસાદથી વાતાવરણમાં ઠંડક પ્રસરી છે, જોકે સતત વરસાદને પગલે તંત્ર દ્વારા નીચાણવાળા વિસ્તારોમાં સાવચેતી રાખવા સૂચના આપવામાં આવી છે. વહીવટી તંત્ર પરિસ્થિતિ પર સતત નજર રાખી રહ્યું છે.
આજના વરસાદની વાત કરીએ તો હવામાન વિભાગના જણાવ્યા મુજબ સવારના 6થી બપોરના 12 વાગ્યા સુધીાં 169 તાલુકામાં વરસાદ નોંધાયો છે. જેમાં સૌથી વધારે કપરાડા અને દીયોદરમાં 2 ઈંચથી વધારે વરસાદ નોંધાયો છે.