Surat: શહેરના લિંબાયત વિસ્તારમાં એક અત્યંત ચોંકાવનારી ઘટના સામે આવી છે. અહીં એક નિર્માણાધિન બિલ્ડિંગ જોવા ગયેલા માતા અને પુત્રી અચાનક પહેલા માળેથી નીચે પટકાયા હતા. જો કે આ ગંભીર અકસ્માતમાં માતા-પુત્રીનો આબાદ બચાવ થયો છે. આ સમગ્ર ઘટના ત્યાં લાગેલા CCTVમાં કેદ થઇ છે.
બાલ્કનીમાં રેલિંગ ના હોવાથી માતા-પુત્રીએ સંતુલન ગુમાવ્યું
લિંબાયત વિસ્તારમાં એક મકાનનું બાંધકામ ચાલી રહ્યું છે. આ નિર્માણાધિન મકાન જોવા માટે એક મહિલા તેની પુત્રી સાથે ગયા હતા. મકાન હજુ તૈયાર થઈ રહ્યું હોવાથી તેની બાલ્કનીમાં સુરક્ષા માટે રેલિંગ લગાવવામાં આવી નહતી.
માતા અને પુત્રી જ્યારે બાલ્કની પાસે ઉભા રહીને નિરીક્ષણ કરી રહ્યા હતા, ત્યારે અચાનક સંતુલન બગડતા બંને સીધા પહેલા માળેથી નીચે જમીન પર પટકાયા હતા. આ ઘટનાના રૂંવાડા ઉભા થઈ જાય તેવા CCTV ફૂટેજ સામે આવ્યા છે.
CCTVમાં જોઈ શકાય છે કે, માતા-પુત્રી ધડામ કરતાં નીચે પટકાતા મોટો અવાજ થતાં આસપાસના રહીશો તાત્કાલિક મદદ માટે દોડી આવે છે. જ્યારે નીચે પટકાયાની ગણતરીની સેકન્ડમાં પુત્ર તરત જ ઉભી થઈને પોતાની ચિંતા કર્યાં વિના બાજુમાં પડેલ માતાની મદદ માટે દોડી જાય છે. જે બાદ સ્થાનિકોએ બન્ને માતા-પુત્રીને સારવાર અર્થે હોસ્પિટલ ખસેડવાની તજવીજ હાથ ધરી હતી. આટલી ઊંચાઈથી પડવા છતાં બન્નેનો ચમત્કારિક બચાવ થયો છે.