Surendranagar news: સુરેન્દ્રનગર જિલ્લાના કોઠારિયા નજીક આવેલ મુખ્ય માર્ગ પર અચાનક એક વીજ પોલ ધરાશાયી થવાની ઘટના સામે આવી હતી. આ ઘટનાની જાણ થતાં જ જિલ્લા વહીવટી તંત્ર તાત્કાલિક એક્શન મોડમાં આવી ગયું હતું. જિલ્લા કલેક્ટરશ્રી જી.એચ. સોલંકીના સીધા માર્ગદર્શન હેઠળ યુદ્ધના ધોરણે કામગીરી હાથ ધરીને ક્ષતિગ્રસ્ત વીજ પોલને હટાવી લેવામાં આવ્યો હતો અને બંધ થઈ ગયેલા વાહનવ્યવહારને ટૂંક જ સમયમાં પૂર્વવત કરી દેવામાં આવ્યો હતો, જેનાથી રાહદારીઓ તથા વાહનચાલકોએ મોટી રાહત અનુભવી છે.
ઘટના અને તંત્રની ત્વરિત કામગીરી
ઘટનાની વિગતો અનુસાર, કોઠારિયાથી આગળના મુખ્ય રોડ પર વીજ પોલ રસ્તાની વચોવચ પડી ગયો હોવાની માહિતી જિલ્લા કંટ્રોલરૂમને પ્રાપ્ત થઈ હતી. રોડ પર પોલ પડવાને કારણે વાહનોની અવરજવર અટકી પડી હતી અને અકસ્માત સર્જાવાનો ભય પણ ઊભો થયો હતો. કંટ્રોલરૂમ તરફથી મેસેજ મળતાની સાથે જ કલેક્ટરશ્રી સોલંકીએ સંબંધિત વિભાગોને ત્વરિત કાર્યવાહી કરવા સૂચના આપી હતી.
ઘટનાની ગંભીરતાને ધ્યાને લઈને પશ્ચિમ ગુજરાત વિજ કંપની લિમિટેડ (PGVCL) ની ટીમ તાત્કાલિક તમામ જરૂરી સાધનો સાથે ઘટનાસ્થળે પહોંચી ગઈ હતી. સ્થળ પર પહોંચીને ટીમ દ્વારા સુરક્ષાના તમામ પગલાં સુનિશ્ચિત કરવામાં આવ્યા હતા અને રસ્તા વચ્ચે પડેલા વીજ થાંભલાને હટાવવાની કામગીરી હાથ ધરવામાં આવી હતી. તંત્રના અધિકારીઓ અને કર્મચારીઓની સઘન મહેનતના પરિણામે યુદ્ધના ધોરણે કામ પૂર્ણ કરીને રસ્તો વાહનવ્યવહાર માટે સત્વરે ખુલ્લો કરી દેવાયો હતો.
નાગરિકોને વહીવટી તંત્રની અપીલ
પ્રવર્તમાન પરિસ્થિતિ અને વાતાવરણને ધ્યાનમાં રાખીને સુરેન્દ્રનગર જિલ્લા વહીવટી તંત્ર દ્વારા તમામ નાગરિકો માટે મહત્વપૂર્ણ સલાહ અને અનુરોધ જાહેર કરવામાં આવ્યા છે: તમામ નાગરિકોને અપીલ કરવામાં આવી છે કે ખૂબ જ જરૂરી કામ ન હોય ત્યાં સુધી ઘરની બહાર નીકળવાનું ટાળવું જેથી કોઈપણ અણબનાવથી બચી શકાય.તેમજ નીચાણવાળા કે જોખમી વિસ્તારોમાં વસવાટ કરતા લોકોને પોતાની અને પોતાના પરિવારની સુરક્ષા સુનિશ્ચિત કરવા માટે તાત્કાલિક સલામત સ્થળોએ સ્થળાંતર કરી લેવા જણાવવામાં આવ્યું છે. આ વહીવટી તંત્ર દ્વારા આશ્વાસન આપવામાં આવ્યું છે કે કોઈપણ પ્રકારની આકસ્મિક પરિસ્થિતિને પહોંચી વળવા માટે સમગ્ર ટીમ સતત કાર્યરત અને એલર્ટ મોડ પર છે.
જિલ્લા તંત્રની આ ઝડપી કામગીરીને કારણે મોટી હોનારત કે ટ્રાફિક જામની સમસ્યા ટળી ગઈ હતી, જે બદલ સ્થાનિકોએ વહીવટી તંત્ર અને PGVCLની ટીમનો આભાર માન્યો હતો.