Vadodara: વડોદરા શહેરમાં નાગરિકોના સ્વાસ્થ્ય સાથે ચેડાં કરતા ભેળસેળિયા તત્વો સામે વડોદરા મહાનગરપાલિકાની ફૂડ સેફ્ટી (ખોરાક) શાખાએ સકંજો કસ્યો છે. રાજ્ય સરકાર દ્વારા નાગરિકોના આરોગ્ય અને સુરક્ષાને સર્વોચ્ચ પ્રાથમિકતા આપીને ડેરી પ્રોડક્ટ્સ અને ખાદ્ય પદાર્થોમાં થતી ભેળસેળ સામે ઝીરો ટોલરન્સની નીતિ અપનાવવાના સ્પષ્ટ આદેશો જારી કરવામાં આવ્યા છે.
સરકારના આ કડક આદેશોના પગલે પાલિકાની ફૂડ ટીમો દ્વારા શહેરના વિવિધ વિસ્તારોમાં અચાનક સઘન દરોડાની કાર્યવાહી હાથ ધરવામાં આવી હતી, જેમાં મોટા પ્રમાણમાં નકલી એટલે કે એનાલોગ પનીર, ચીઝ, બટર અને અખાદ્ય ખાદ્ય સામગ્રી ઝડપાઈ છે.
રાજ્ય સરકારના આદેશો અને પાલિકાની 14 યુનિટ્સ પર તપાસ
રાજ્ય સરકારના ગૃહ અને આરોગ્ય વિભાગ દ્વારા અગાઉ જ સ્પષ્ટ સૂચનાઓ આપવામાં આવી હતી કે તહેવારો કે સામાન્ય દિવસો દરમિયાન બજારમાં ગ્રાહકોને અસલી પનીર કે દૂધની બનાવટોના નામે હાનિકારક 'એનાલોગ' વનસ્પતિ ચરબી અને પામ ઓઈલમાંથી બનતી નકલી બનાવટ વેચતા વિક્રેતાઓ સામે કાયદાકીય કડકાઈ દાખવવી.
આ આદેશોને પગલે વડોદરા પાલિકાની ખોરાક શાખાની ટીમો દ્વારા શહેરમાં અલગ-અલગ જગ્યાએ આવેલા ડેરી પાર્લર, હોલસેલ વિક્રેતાઓ અને ખાદ્ય સામગ્રીના વેપારીઓની કુલ 14 જેટલી દુકાનો અને યુનિટ્સમાં અચાનક તપાસ કરવામાં આવી હતી. આ દરમિયાન બજારમાં ગ્રાહકોને અસલી પનીરના ભ્રમમાં વેચાણ કરવામાં આવતું 362 કિલોગ્રામ શંકાસ્પદ અને હાનિકારક એનાલોગ પનીર ઝડપી પાડવામાં આવ્યું હતું.
ક્યાંથી કેટલો જથ્થો પકડાયો?
રાજ્ય સરકારની ગાઈડલાઈન મુજબ ફૂડ સેફ્ટી સ્ટાન્ર્ડ્સ એક્ટ હેઠળ અલગ-અલગ વિસ્તારોમાં નીચે મુજબની કાર્યવાહી કરવામાં આવી:
હરે કૃષ્ણા ટ્રેડર્સ (હરણી): પાલિકાની ટીમે હરણી વિસ્તારમાં આવેલી આ પેઢી પર દરોડો પાડીને સૌથી મોટો જથ્થો જપ્ત કર્યો હતો. અહીંથી સરકારના નિયમોના ભંગ બદલ અંદાજે 291 કિલોગ્રામ એનાલોગ પનીર મળી આવ્યું હતું.
વ્હાઇટ હાઉસ ડેરી (આજવા રોડ): આજવા રોડ પર ધમધમતી આ ડેરીમાંથી 79 કિલોગ્રામ એનાલોગ પનીર મળી આવ્યું હતું, જેને પાલિકાએ કબજે લીધું છે.
શિવાંશ એન્ટરપ્રાઇઝ (આર.વી. દેસાઈ રોડ): અહીં તપાસ દરમિયાન 12 કિલોગ્રામ એનાલોગ પનીર ઝડપાયું હતું.
ક્રિશિવ એન્ટરપ્રાઇઝ (આર.વી. દેસાઈ રોડ): આ એકસલુઝિવ એન્ટરપ્રાઇઝમાંથી પણ 80 કિલોગ્રામ જેટલું શંકાસ્પદ એનાલોગ પનીર જપ્ત કરવામાં આવ્યું હતું.
471 કિલો અખાદ્ય સામગ્રીનો સ્થળ પર નાશ અને કડક કાર્યવાહી
ખોરાક શાખાની ટીમોએ સરકારના નિર્દેશો મુજબ માત્ર પનીર જ નહીં, પરંતુ અન્ય ડેરી પ્રોડક્ટ્સ જેવી કે ચીઝ અને બટરનું પણ ઝીણવટપૂર્વક નિરીક્ષણ કર્યું હતું. પ્રાથમિક તપાસમાં ગ્રાહકોના આરોગ્ય માટે જોખમી સાબિત થઈ શકે તેવી કુલ 471 કિલોગ્રામ જેટલી ભારે અખાદ્ય અને વાસી ખાદ્ય સામગ્રી સ્થળ પર જ જપ્ત કરીને નાશ કરવામાં આવી હતી.
આ તમામ શંકાસ્પદ નમૂનાઓને લેબોરેટરી પરીક્ષણ માટે મોકલી આપવામાં આવ્યા છે, જેના રિપોર્ટ આવ્યા બાદ સંબંધિત વેપારીઓ સામે રાજ્ય સરકારના કાયદાકીય નિયમો મુજબ ફોજદારી ગુનાઓ અને ભારે દંડની કાર્યવાહી હાથ ધરવામાં આવશે.
રાજ્ય સરકારના આકરા આદેશો અને પાલિકાની આ સક્રિય કામગીરીથી નાગરિકોમાં રાહતની લાગણી ફેલાઈ છે, સાથે જ આરોગ્ય અધિકારીઓએ ચેતવણી આપી છે કે, આગામી દિવસોમાં પણ આ પ્રકારની ચકાસણી અભિયાન સતત ચાલુ રહેશે જેથી શહેરીજનોને શુદ્ધ, સુરક્ષિત અને ગુણવત્તાયુક્ત ખોરાક મળી રહે.