Pakistan Politics: પાકિસ્તાનના રાજકીય ક્ષેત્રે આંતરિક વિખવાદ અને સત્તા સંઘર્ષ ચરમસીમાએ પહોંચ્યો છે. પાકિસ્તાનના ગૃહમંત્રી મોહસિન નકવીએ દેશની શાસન વ્યવસ્થા સંપૂર્ણપણે પડી ભાંગી હોવાનું નિવેદન આપ્યા બાદ હવે પાકિસ્તાનના ઇતિહાસના સૌથી મોટા કૌભાંડનો પર્દાફાશ કરવાનો દાવો કર્યો છે. આ સનસનીખેજ દાવાને કારણે વડાપ્રધાન શહેબાઝ શરીફની સરકાર ધર્મસંકટમાં મુકાઈ ગઈ છે અને દેશમાં ફરી એકવાર લશ્કરી તખ્તાપલટની આશંકાઓ તેજ બની છે.
21 વર્ષ જૂની લાંચખોરી અને દેશનું સૌથી મોટું કૌભાંડ
ગૃહમંત્રી મોહસિન નકવીએ તાજેતરમાં પત્રકારો સાથેની વાતચીતમાં દાવો કર્યો હતો કે પાકિસ્તાનના ઇતિહાસમાં આટલું મોટું કૌભાંડ ક્યારેય થયું નથી. આ કૌભાંડમાં ન્યાયાધીશો, અમલદારો, રાજકારણીઓ અને બેંકર્સ સહિત સરકારી તંત્રના અનેક મહત્વના ઉચ્ચ હોદ્દેદારો સામેલ છે. નકવીના જણાવ્યા અનુસાર, દેશમાં છેલ્લા 21 વર્ષથી સતત લાંચ આપવામાં આવી રહી હતી અને લોકો તે લેતા રહ્યા હતા. તેમણે ભારપૂર્વક જણાવ્યું છે કે આ કૌભાંડ માટે જવાબદાર તમામ લોકો સામે આકરી કાર્યવાહી કરવામાં આવશે. જોકે, તેમણે હજી સુધી કોઈના નામ જાહેર કર્યા નથી.
ગૃહમંત્રી અને વડાપ્રધાન વચ્ચે ખુલ્લો જંગ
મોહસિન નકવી અને વડાપ્રધાન શહેબાઝ શરીફ વચ્ચેનો ગંભીર વિખવાદ હવે જાહેરમાં આવી ગયો છે. નકવીએ અગાઉ પાકિસ્તાન ઇકોનોમિક સમિટમાં વિવાદાસ્પદ નિવેદન આપ્યું હતું કે દાયકાઓ જૂની શાસન વ્યવસ્થા સંપૂર્ણપણે નિષ્ફળ ગઈ છે અને દેશની પડકારોનો સામનો કરવા સક્ષમ નથી. આ નિવેદનને શહેબાઝ શરીફ પર સીધો પ્રહાર માનવામાં આવે છે.
નકવીની આ આકરી ટીકા સામે રક્ષામંત્રી ખ્વાજા આસિફે પણ તીખી પ્રતિક્રિયા આપી છે. તેમણે દાવો કર્યો છે કે નકવી કેબિનેટના સૌથી શક્તિશાળી મંત્રી હોવા છતાં ભાગ્યે જ 2-3 કેબિનેટ બેઠકોમાં હાજર રહ્યા છે અને તેઓ સરકારી સિસ્ટમનો ભાગ હોય તેવું લાગતું નથી. તેમણે ઉમેર્યું કે જો દેશનો ગૃહમંત્રી જ સિસ્ટમની ફરિયાદ કરતો હોય તો સરકારે પોતાનું બોરિયા-બિસ્તર સંકેલી લેવું જોઈએ.
સેના પ્રમુખ આસિમ મુનીરની શાતિર ચાલ?
રાજકીય વિશ્લેષકોનું માનવું છે કે આ સમગ્ર ઘટનાક્રમ પાછળ પાકિસ્તાનના સેના પ્રમુખ જનરલ આસિમ મુનીરની મજબૂત પકડ હોઈ શકે છે. મોહસિન નકવી સેના પ્રમુખના અત્યંત નજીકના માનવામાં આવે છે અને તેઓ આસિમ મુનીરની પત્નીના સંબંધમાં ભાઈ થાય છે. જનરલ મુનીર પાકિસ્તાનની સત્તા પર પોતાનો પ્રભાવ વધારવા ઈચ્છે છે.
એવું માનવામાં આવે છે કે મુનીર ભૂતપૂર્વ લશ્કરી શાસક પરવેઝ મુશર્રફના મોડલ પર ચાલીને રાષ્ટ્રપતિ અને સેના પ્રમુખ બંને પદો પર એકસાથે કબજો મેળવવાની ફિરાકમાં છે. નકવી દ્વારા નવા વહીવટી પ્રાંતો અને સુધારાની જે હિમાયત કરવામાં આવી રહી છે, તેને પાકિસ્તાની સેનાનું ખુલ્લું સમર્થન મળ્યું છે. આનાથી રાજકીય પક્ષોની તાકાત નબળી પડશે અને સેનાનો પ્રભાવ વધશે.
શહેબાઝ શરીફ દ્વારા બચાવની કામગીરી
આ રાજકીય ભૂકંપ વચ્ચે વડાપ્રધાન શહેબાઝ શરીફે બચાવ અને આંતરિક સમીક્ષા માટે તમામ સંઘીય મંત્રાલયો અને વિભાગોની કામગીરીની વ્યાપક તપાસ કરવાનો આદેશ આપ્યો છે. તમામ મંત્રાલયોને ફેબ્રુઆરી 2024 થી અત્યાર સુધીની તેમની સિદ્ધિઓનો વિગતવાર અહેવાલ સત્તાવાર દસ્તાવેજી પુરાવા સાથે સબમિટ કરવા માટે કડક સૂચના આપવામાં આવી છે. બીજી તરફ, દેશના મુખ્ય શાસક પક્ષો આ ગંભીર મુદ્દે મૌન સેવી રહ્યા છે, જેના કારણે ઇસ્લામાબાદમાં ચર્ચાઓ અને રહસ્ય વધુ ઘેરાયું છે.