Who Is Neal Katyal: અમેરિકાની સુપ્રીમ કોર્ટે એક મોટો ચુકાદો આપ્યો છે, જેમાં રાષ્ટ્રપતિ ડોનાલ્ડ ટ્રમ્પ દ્વારા વિશ્વભરમાં લાદવામાં આવેલા ભારે ટેરિફને ગેરકાયદેસર જાહેર કરવામાં આવ્યો છે. આ ઐતિહાસિક નિર્ણયના કેન્દ્રમાં એક ભારતીય મૂળના વકીલ છે કે જેમણે અમેરિકાની સર્વોચ્ચ અદાલતમાં નાના વ્યવસાયો વતી દલીલ કરી હતી અને જીત મેળવી હતી.
ભારતથી અમેરિકા સ્થળાંતર કરનારા માતાપિતાના પુત્ર નીલ કાત્યાલે ટ્રમ્પના ટેરિફને ગેરકાયદેસર જાહેર કરવામાં મુખ્ય ભૂમિકા ભજવી હતી અને કોર્ટમાં જોરશોરથી કેસની દલીલ કરી હતી. કાત્યાલે ભૂતપૂર્વ રાષ્ટ્રપતિ બરાક ઓબામાના શાસનકાળમાં અમેરિકાના કાર્યકારી સોલિસિટર જનરલ તરીકે પણ સેવા આપી હતી.
છેવટે તેઓ સંમત થયા અને અમે જીતી ગયા
શુક્રવારે સુપ્રીમ કોર્ટના નિર્ણય પછી તરત જ કાત્યાલે X પર પોસ્ટ કરી કે અમે જીતી ગયા છીએ. MS Now સાથેની એક મુલાકાતમાં કાત્યાલે કહ્યું કે આજે અમેરિકન સિસ્ટમની એક મહાન ગુણવત્તા દર્શાવી છે. હું ઇમિગ્રન્ટ્સનો દિકરો કોર્ટમાં જઈ શક્યો અને નાના અમેરિકન વ્યવસાયો વતી બોલવામાં સફળ રહ્યો કે રાષ્ટ્રપતિ ગેરકાયદેસર રીતે કાર્ય કરી રહ્યા છે. મેં મારો કેસ રજૂ કર્યો, તેઓએ મને કેટલાક મુશ્કેલ પ્રશ્નો પૂછ્યા, અમારી વચ્ચે સારી ચર્ચા થઈ અને છેવટે તેઓ સંમત થયા અને અમે જીતી ગયા. આ દેશની ખાસ વાત છે. આપણી પાસે એક સિસ્ટમ છે જે પોતાને સુધારે છે.
કાત્યલનો જન્મ 1970માં શિકાગોમાં થયો હતો
કાત્યલે આગળ કહ્યું કે અહીં આપણે કહી શકીએ છીએ કે ભલે તમે વિશ્વના સૌથી શક્તિશાળી વ્યક્તિ હોવ, પણ તમે બંધારણ તોડી શકતા નથી. મારા માટે,આજનો દિવસ તેના વિશે છે. કાત્યલનો જન્મ 1970માં શિકાગોમાં થયો હતો. તેની માતા બાળરોગ નિષ્ણાત હતી અને તેના પિતા એન્જિનિયર હતા, જે બંને ભારતથી અમેરિકામાં સ્થળાંતરિત થયા હતા. કાત્યલ હાલમાં વોશિંગ્ટન DCમાં મિલબેંક LLPમાં ભાગીદાર છે અને મુકદ્દમા અને મધ્યસ્થી જૂથના સભ્ય છે. નિર્ણય પછી જાહેર કરાયેલા એક નિવેદનમાં કાત્યલે કહ્યું કે અમેરિકાની સુપ્રીમ કોર્ટે કાયદાના શાસન અને બધા અમેરિકનો માટે ઊભા રહીને સારું કામ કર્યું છે.
આપણું બંધારણ રાષ્ટ્રપતિ કરતાં વધુ શક્તિશાળી છે
કાત્યાલે કહ્યું કે કોર્ટનો સંદેશ સ્પષ્ટ હતો: રાષ્ટ્રપતિ શક્તિશાળી છે, પરંતુ આપણું બંધારણ તેનાથી પણ વધુ શક્તિશાળી છે. અમેરિકા ફક્ત કોંગ્રેસ જ અમેરિકન લોકો પર કર લાદી શકે છે. સુપ્રીમ કોર્ટે અમારા કેસને અમે જે માંગ્યું તે બધું જ આપ્યું છે.કાત્યાલે લિબર્ટી જસ્ટિસ સેન્ટરના નેતૃત્વ માટે કૃતજ્ઞતા વ્યક્ત કરી જે જ્યારે અન્ય લોકોએ લડ્યા નહીં ત્યારે લડ્યા. તેમણે કહ્યું કે આ કેસ હંમેશા રાષ્ટ્રપતિ પદ વિશે હતો કોઈ એક રાષ્ટ્રપતિ વિશે નહીં. તે હંમેશા સત્તાઓના વિભાજન વિશે હતો, વર્તમાન રાજકારણ વિશે નહીં. મને ખુશી છે કે આપણી સુપ્રીમ કોર્ટ, જે 250 વર્ષથી આપણી સરકારનો પાયો રહી છે, તે આપણા સૌથી મૂળભૂત મૂલ્યોનું રક્ષણ કરી રહી છે.