US Tariff Update News: અમેરિકાના રાષ્ટ્રપતિ ડોનાલ્ડ ટ્રમ્પે ભારત સહિત અનેક દેશો પર લાદવામાં આવેલા પારસ્પરિક ટેરિફ (Reciprocal Tariff) માં ધરખમ ઘટાડો કરવાની સત્તાવાર જાહેરાત કરી છે. વ્હાઇટ હાઉસ દ્વારા 20 ફેબ્રુઆરીએ જારી કરાયેલા આદેશ મુજબ, ભારતથી અમેરિકા નિકાસ થતા માલ પર વધારાની આયાત ડ્યુટી હવે ૨૫% ને બદલે 15% લાગશે. આ નવા દરો 24 ફેબ્રુઆરી, 2026 થી અમલમાં આવશે, જેનો સીધો ફાયદો ભારતીય ઉત્પાદકો અને નિકાસકારોને મળશે.
શું છે આ નિર્ણય અને તેની અસર?
ટેરિફ એટલે કે આયાત ડ્યુટી એ કોઈપણ દેશ દ્વારા વિદેશથી આવતી વસ્તુઓ પર લાદવામાં આવતો કર છે. જ્યારે ટેરિફ વધે છે ત્યારે વસ્તુઓ મોંઘી થાય છે, પરંતુ હવે 10% નો ઘટાડો થતા અમેરિકન બજારમાં ભારતીય ઉત્પાદનો વધુ સ્પર્ધાત્મક બનશે. આ નવી વ્યવસ્થા આગામી 150 દિવસ એટલે કે અંદાજે જુલાઈ 2026 સુધી અમલમાં રહેશે.
ટેરિફની સફર: 50% થી 15% સુધીનો ઘટાડો
ભારત પર લાદવામાં આવેલા ટેરિફના દરોમાં છેલ્લા એક વર્ષમાં અનેક ઉતાર-ચઢાવ જોવા મળ્યા છે:
- એપ્રિલ 2025: ટ્રમ્પ વહીવટીતંત્રે ભારત પર 26% પારસ્પરિક ટેરિફ લાદવાની જાહેરાત કરી હતી.
- ઓગસ્ટ 2025: રશિયા પાસેથી તેલ ખરીદવાના વિવાદમાં ભારત પર વધારાની 25% દંડાત્મક ડ્યુટી લાદવામાં આવી, જેનાથી કુલ ટેરિફ 50% પર પહોંચી ગયો હતો.
- ફેબ્રુઆરી 2026: વચગાળાના વેપાર કરાર બાદ દંડાત્મક ડ્યુટી હટાવીને દર 18% કરવામાં આવ્યો.
- વર્તમાન સ્થિતિ: હવે તેને વધુ ઘટાડીને 15% કરી દેવામાં આવ્યો છે.
કયા ક્ષેત્રોને થશે સૌથી વધુ ફાયદો?
ભારત અમેરિકામાં અનેક મહત્વની ચીજવસ્તુઓની નિકાસ કરે છે. ટેરિફમાં ઘટાડાથી નીચે મુજબના ક્ષેત્રોને સીધો લાભ થશે:
- 1) ફાર્માસ્યુટિકલ્સ: દવાઓ અને તેના ઘટકો.
- 2) ટેક્સટાઇલ: તૈયાર વસ્ત્રો (ગારમેન્ટ્સ).
- 3) જ્વેલરી: કિંમતી પથ્થરો અને ઘરેણાં.
- 4) ઓટો પાર્ટ્સ: વાહનોના સ્પેરપાર્ટ્સ.
- 5) આઈટી અને ટેલિકોમ: ટેલિકોમ સાધનો અને સોફ્ટવેર સેવાઓ.
કેટલીક વસ્તુઓને મળી સંપૂર્ણ મુક્તિ
અમેરિકાએ પોતાની સ્થાનિક જરૂરિયાતોને ધ્યાનમાં રાખીને કેટલીક આવશ્યક વસ્તુઓને આ ૧૫% ટેરિફમાંથી પણ મુક્તિ આપી છે. આ યાદીમાં જીવનરક્ષક દવાઓ, ખાતરો, ઉર્જા ઉત્પાદનો, પેસેન્જર બસો અને કેટલાક એરોસ્પેસ ઉત્પાદનોનો સમાવેશ થાય છે. જોકે, સ્ટીલ અને એલ્યુમિનિયમ પર 50% ની ઊંચી ડ્યુટી હજુ પણ યથાવત રહેશે.
વેપાર વાટાઘાટોને નવો વેગ
આ ઘટાડો એવા સમયે આવ્યો છે જ્યારે ભારત અને અમેરિકા વચ્ચે વેપાર કરારના પ્રથમ તબક્કા માટે વાટાઘાટો ચાલી રહી છે. 23 ફેબ્રુઆરીથી વોશિંગ્ટનમાં ભારતીય પ્રતિનિધિમંડળ કાનૂની ડ્રાફ્ટ તૈયાર કરવા માટે ચર્ચા કરશે. એવી પ્રબળ શક્યતા છે કે આવતા મહિના સુધીમાં બંને દેશો ઐતિહાસિક વેપાર કરાર પર હસ્તાક્ષર કરી દેશે.
ભારતનો વેપાર પક્ષ મજબૂત
નોંધનીય છે કે સેવા ક્ષેત્રમાં ભારતનો પક્ષ ખૂબ મજબૂત છે. ભારતે 28.7 બિલિયન ડોલરની નિકાસ સામે 25.5 બિલિયન ડોલરની આયાત કરી છે. એકંદરે, ભારતનો અમેરિકા સાથેનો વેપાર લાભ (Trade Surplus) આશરે 44.4 બિલિયન ડોલર જેટલો છે. આ નિર્ણયથી ભારતીય ઉદ્યોગ જગતમાં રાહતનો શ્વાસ લેવામાં આવ્યો છે. ૧૫૦ દિવસની આ અસ્થાયી રાહત બાદ જુલાઈ ૨૦૨૬માં અમેરિકા શું વલણ અપનાવશે તે જોવું રસપ્રદ રહેશે, પરંતુ હાલના તબક્કે 'મેક ઈન ઈન્ડિયા' ઉત્પાદનો માટે અમેરિકાના દ્વાર વધુ સરળતાથી ખુલ્યા છે.