Putin Visit India: રશિયન રાષ્ટ્રપતિ વ્લાદિમીર પુતિન ગુરુવારે સાંજે દિલ્હી પહોંચ્યા હતા. તેઓ સીધા જ વડાપ્રધાન મોદીના નિવાસસ્થાને ખાનગી રાત્રિભોજન માટે રવાના થયા હતા. આ યાત્રા 23મા ભારત-રશિયા વાર્ષિક શિખર સંમેલન માટે 4 ડિસેમ્બરની સાંજે શરૂ થઈ હતી. ફેબ્રુઆરી 2022 માં યુક્રેનમાં યુદ્ધ શરૂ થયા પછી આ તેમની ભારતની પ્રથમ સત્તાવાર મુલાકાત છે. પુતિનની છેલ્લી ભારત યાત્રા ડિસેમ્બર 2021 માં થઈ હતી.
રાષ્ટ્રપતિ પુતિનનો આજનો કાર્યક્રમ
પુતિનના મુખ્ય સત્તાવાર કાર્યક્રમો શુક્રવાર 5 ડિસેમ્બરના રોજ યોજાશે. સવારે 11:00 વાગ્યે પુતિન રાષ્ટ્રપતિ ભવનમાં ભારતના રાષ્ટ્રપતિ સાથે મુલાકાત કરશે. રાષ્ટ્રપતિ ભવનથી તેઓ રાજઘાટ જઈને મહાત્મા ગાંધી સ્મારક પર શ્રદ્ધાંજલિ અર્પણ કરશે. ત્યારબાદ તેઓ હૈદરાબાદ હાઉસ જશે, જ્યાં મોટાભાગની રાજદ્વારી ચર્ચાઓ થશે. તે જ દિવસે પુતિન રશિયન સરકારી પ્રસારક આરટી ટીવીની નવી ભારતીય ચેનલનું પણ શુભારંભ કરશે. સમાચાર એજન્સી પીટીઆઈ અનુસાર રશિયન નેતા શુક્રવારે સાંજે ભારતથી પ્રસ્થાન કરશે.
મોદી અને પુતિન વચ્ચે દ્વિપક્ષીય બેઠક
વડાપ્રધાન મોદી અને પુતિન વચ્ચેની વાર્ષિક ભારત-રશિયા શિખર વાર્તા 5 ડિસેમ્બરે હૈદરાબાદ હાઉસમાં યોજાશે. આ વર્તમાન રાજકીય મુલાકાત દરમિયાન રશિયન રાષ્ટ્રપતિ વ્લાદિમીર પુતિન વડાપ્રધાન નરેન્દ્ર મોદી સાથે વાટાઘાટો કરશે અને પરસ્પર હિતના વિવિધ પ્રાદેશિક અને વૈશ્વિક મુદ્દાઓ પર ચર્ચા કરશે. મોદી-પુતિન વાર્તા પછી બંને પક્ષો દ્વારા અનેક કરારો પર હસ્તાક્ષર થવાની અપેક્ષા છે. આ કરારોમાંનો એક રશિયામાં ભારતીય વર્કર્સની અવરજવરને સરળ બનાવવા માટે હશે.
ટેરિફ લાદ્યા પછી અમેરિકા અને ભારત વચ્ચે તણાવને કારણે પુતિનની આ યાત્રા ખૂબ મહત્વની માનવામાં આવી રહી છે. આ દ્વિપક્ષીય બેઠક નિર્ણાયક છે, કારણ કે આ દરમિયાન ઘણા કરારો પર હસ્તાક્ષર થવાની અપેક્ષા છે, જે બંને દેશો વચ્ચેની આર્થિક ભાગીદારીને મજબૂત કરશે. વેપાર, અર્થતંત્ર, આરોગ્ય સંભાળ, શિક્ષણ, સંસ્કૃતિ અને મીડિયા જેવા ક્ષેત્રોમાં વિશેષ રસ દાખવવામાં આવ્યો છે.