પ્રયાગરાજ: ન્યાયિક સ્વતંત્રતા અને પારદર્શિતા જાળવી રાખવા માટે અલ્હાબાદ હાઈકોર્ટે એક અત્યંત કડક વલણ અપનાવ્યું છે. હાઈકોર્ટના ન્યાયમૂર્તિ કૃષ્ણ પહલે એક જામીન અરજી પર આદેશ જારી કરતા પહેલા જ પોતાને સુનાવણીથી અલગ કરી લીધા છે. કોર્ટે આ ઘટનાને ન્યાયતંત્રના ઇતિહાસનો કાળો દિવસ ગણાવીને ગંભીર ચિંતા વ્યક્ત કરી છે.
શું છે સમગ્ર મામલો?
આ વિવાદ કોડીન યુક્ત સીરપના કેસમાં ધરપકડ કરાયેલા આરોપીઓની જામીન અરજીઓ સાથે જોડાયેલો છે. આ કેસમાં આશરે 80 જેટલી જામીન અરજીઓ પર સુનાવણી ચાલી રહી હતી. સુનાવણી દરમિયાન એવી વિગત સામે આવી હતી કે પક્ષકારો દ્વારા ન્યાયમૂર્તિ સુધી પહોંચવાનો અને તેમની સાથે સંપર્ક સ્થાપિત કરવાનો પ્રયાસ કરવામાં આવ્યો હતો. આ બાબતને અત્યંત ગંભીરતાથી લેતા જજે સુનાવણી છોડવાનો નિર્ણય લીધો હતો.
ન્યાય થવો જ જોઈએ અને થતો દેખાવો પણ જોઈએ
ન્યાયમૂર્તિ પહલે પોતાના આદેશમાં જણાવ્યું હતું કે ન્યાય થવો જ જોઈએ એટલું પૂરતું નથી, પરંતુ તે થતો દેખાવો પણ જોઈએ. તેમણે ઉમેર્યું કે જો તેઓ આ મામલે કોઈ ચુકાદો આપે અને તે જે-તે પક્ષના હિતમાં હોય, તો એવી ખોટી છાપ ઊભી થઈ શકે છે કે આ ફેંસલો કોઈ બાહ્ય દબાણ કે સંપર્કને કારણે લેવામાં આવ્યો છે. કોર્ટે વકીલો અને પક્ષકારોને ચેતવણી આપતા કહ્યું કે ન્યાયિક સ્વતંત્રતા એ કોઈ વિશેષાધિકાર નથી પરંતુ દરેક નાગરિકનો બંધારણીય અધિકાર છે અને તેને નબળો પાડવાના કોઈપણ પ્રયાસની કડક નિંદા થવી જોઈએ.
અગાઉ પણ જામીન અરજીઓ ફગાવવામાં આવી હતી
આ કેસના આરોપીઓએ અગાઉ પણ અનેક વખત રાહત મેળવવાના પ્રયાસો કર્યા હતા. સૌથી પહેલા એફઆઈઆર રદ કરવા માટે હાઈકોર્ટની ત્રણ અલગ-અલગ ખંડપીઠો અને લખનૌ બેન્ચમાં અરજીઓ કરવામાં આવી હતી, જે ફગાવી દેવામાં આવી હતી. ત્યારબાદ આગોતરા જામીન માટેની અરજીઓમાં પણ કોઈ રાહત મળી ન હતી અને ધરપકડો ચાલુ રહી હતી. અત્યાર સુધીમાં 4 આરોપીઓની નિયમિત જામીન અરજીઓ પણ હાઈકોર્ટની વિવિધ પીઠો દ્વારા રદ કરવામાં આવી ચૂકી છે.
આગામી સુનાવણી 7 ઓગસ્ટના રોજ
ન્યાયમૂર્તિ કૃષ્ણ પહલે હવે આ 80 જામીન અરજીઓ અન્ય પીઠને સોંપવા માટે મુખ્ય ન્યાયમૂર્તિને મોકલવાનો આદેશ આપ્યો છે. આ તમામ કેસોની હવે પછીની સુનાવણી 7 ઓગસ્ટ 2026 ના રોજ હાથ ધરવામાં આવશે. કોર્ટે સ્પષ્ટ કર્યું છે કે ન્યાયિક પ્રક્રિયામાં કોઈપણ પ્રકારનો હસ્તક્ષેપ જનતાના ન્યાયતંત્ર પરના ભરોસાને નબળો પાડે છે, જે લોકશાહી માટે જોખમી છે.